ढोल-ताशांचा गजर, पारंपरिक कलांचे सादरीकरण आणि जलाल उद्दीन डीजेचा दणदणाट; ठिकठिकाणी चणे प्रसादाचे वाटप
मालेगाव, जि. वाशिम (प्रतिनिधी) :
अनंत चतुर्दशीच्या पार्श्वभूमीवर मालेगाव शहरात लाडक्या गणरायाला निरोप देण्यासाठी गणेश विसर्जन मिरवणुकीला उत्साहात सुरुवात झाली. ढोल-ताशांचा गजर, पारंपरिक कलांचे सादरीकरण आणि भक्तिमय वातावरणात हजारो गणेशभक्त मिरवणुकीत सहभागी झाले आहेत.
मिरवणुकीत ग्रामीण संस्कृतीची ओळख असलेले पारंपरिक खेळ, अस्वलाचे सोंग तसेच विविध पारंपरिक सोंगांचे सादरीकरण करण्यात आले. यासोबतच भरतनाट्यम, महादेवाच्या रूपातील सोंगे आणि विविध मर्दानी खेळांनी उपस्थितांचे लक्ष वेधले.
तरुणाईच्या उत्साहात जलाल उद्दीन डीजेच्या साऊंड सिस्टीमवर गणेशगीतांचा ठेका धरला जात असून, मिरवणूक मार्गावर उत्साहाचे वातावरण निर्माण झाले आहे. लहानांपासून ज्येष्ठांपर्यंत नागरिक मिरवणुकीचा आनंद घेत आहेत.
मिरवणुकीत सहभागी भाविक व नागरिकांसाठी शहरातील विविध ठिकाणी चणे प्रसादाचे वाटप करण्यात येत आहे. अनेक मंडळे आणि नागरिकांनी मिरवणूक मार्गावर प्रसाद वाटपाची व्यवस्था केली आहे.
विसर्जन मिरवणूक शांततेत व सुरळीत पार पडावी यासाठी पोलीस प्रशासन आणि स्थानिक यंत्रणा सज्ज असून, संवेदनशील ठिकाणी बंदोबस्त ठेवण्यात आला आहे. “गणपती बाप्पा मोरया, पुढच्या वर्षी लवकर या”च्या जयघोषात मालेगावकर गणरायाला भावपूर्ण निरोप देत आहेत.
