तुलशी आय हॉस्पिटल, नाशिकच्या सहकार्याने आयोजन; सुमारे १५० नागरिकांची नेत्र तपासणी, गरजेनुसार शस्त्रक्रियेबाबत मार्गदर्शन
मऱ्हळ, प्रतिनिधी : लोणारी युवा संघ महाराष्ट्र राज्याच्या वतीने तुलशी आय हॉस्पिटल, नाशिक यांच्या सहकार्याने मऱ्हळ येथे मोफत नेत्र तपासणी व शस्त्रक्रिया शिबिराचे आयोजन करण्यात आले. श्री लोमेष ऋषी सार्वजनिक वाचनालय, हनुमान मंदिर, मऱ्हळ येथे २४ सप्टेंबर रोजी झालेल्या या शिबिराला नागरिकांचा उत्स्फूर्त प्रतिसाद मिळाला.
तज्ञ डॉक्टरांची टीम, प्रशिक्षित तंत्रज्ञ तसेच अत्याधुनिक वैद्यकीय उपकरणांच्या सहाय्याने शिबिर घेण्यात आले. तुलशी आय हॉस्पिटलचे डॉ. पिंजारी व डॉ. धोंगडे यांनी सुमारे १५० नागरिकांची नेत्र तपासणी करून आवश्यक शस्त्रक्रिया, उपचार व पुढील वैद्यकीय प्रक्रियेबाबत मार्गदर्शन केले. रुग्णांच्या सुविधेसाठी हॉस्पिटलच्या वतीने मोफत फिरता दवाखाना व्हॅन तसेच प्रशिक्षित तंत्रज्ञ उपलब्ध करून देण्यात आले.
शिबिराच्या उद्घाटनप्रसंगी लोणारी युवा संघ महाराष्ट्र राज्याचे संस्थापक व अध्यक्ष विजय संवत्सरकर, ह.भ.प. रमण हिंगे महाराज, भोकणी हायस्कूलचे मुख्याध्यापक रानडे सर, सुरेगावचे सरपंच रमेश इलग, मुख्याध्यापक मोरे सर, शिंगणापूर ग्रामपंचायतीचे उपसरपंच संजय तुळसकर, प्रवीण गेंद साहेब व संजय कुऱ्हे उपस्थित होते. केरू कुऱ्हे, एम. जी. कुऱ्हे सर व धेंडुळे सर हे प्रमुख पाहुणे म्हणून उपस्थित होते.
यावेळी लोणारी युवा संघाच्या वतीने मऱ्हळ पंचक्रोशीतील सार्वजनिक गणपती मंडळांची पर्यावरण, प्रदूषणमुक्तता व उत्कृष्ट सजावट या निकषांवर स्पर्धा घेण्यात आली. यामध्ये शिवतांडव मित्र मंडळ व श्रीगणेशा मित्र मंडळ यांना प्रथम, विघ्नहर्ता मित्र मंडळाला द्वितीय तर भवानी मित्र मंडळाला तृतीय क्रमांक मिळाला. विजेत्या मंडळांना सन्मानचिन्ह व रोख पारितोषिक देऊन गौरविण्यात आले.
तसेच ७५ वर्षीय ‘लोणारी भूषण’ अशोक अण्णा लोणारी बुल्हे यांनी पॉवरलिफ्टिंगमधील डेडलिफ्टिंग प्रकारात जिल्हास्तरावर प्रथम क्रमांक मिळवल्याबद्दल लोणारी युवा संघ महाराष्ट्र राज्याच्या वतीने त्यांचा सन्मानचिन्ह देऊन सत्कार करण्यात आला.
शिबिराच्या यशस्वी आयोजनासाठी तालुकाध्यक्ष नितीन कुऱ्हे, जिल्हाप्रमुख चंद्रकांत कुऱ्हे, कैलास आढाव सर, खजिनदार अनिल इंगळे, ललित संवत्सरकर, यश कुऱ्हे, ऋषिकेश धोक्रट, नवनाथ धोक्रट, मयुरेश कुऱ्हे व सचिन थिटे यांनी विशेष परिश्रम घेतले. ग्रामपंचायत मऱ्हळ तसेच ग्रामस्थांनीही शिबिरासाठी सहकार्य केले.
कार्यक्रमाचे सूत्रसंचालन के. आर. कुऱ्हे सर यांनी केले. अध्यक्षीय भाषणात विजय संवत्सरकर यांनी तुलशी आय हॉस्पिटल, ग्रामपंचायत मऱ्हळ व ग्रामस्थांचे सहकार्याबद्दल आभार मानले.
