आवडीच्या क्षेत्रात प्रावीण्य मिळवून देशाच्या उंचीत योगदान द्या : प्राचार्य अभयकुमार सांळुखे
जत, दि. २८ : प्रतिनिधी –
“विद्यार्थ्यांमध्ये असलेल्या कलागुणांना योग्य व्यासपीठ मिळाले पाहिजे. विद्यार्थ्यांनी आपल्या आवडीच्या क्षेत्रात प्रावीण्य मिळवून त्यातून अर्थार्जन करण्याबरोबरच समाज आणि देशाच्या उभारणीत योगदान द्यावे. आपल्या कलेच्या माध्यमातून देशाला बळ मिळू शकते आणि देशाची उंचीही वाढू शकते,” असे प्रतिपादन प्राचार्य अभयकुमार सांळुखे यांनी केले.
राजे रामराव महाविद्यालय, जत येथे शिवाजी विद्यापीठाच्या विद्यार्थी विकास मंडळाच्या मार्गदर्शनाखाली आयोजित ४६ व्या युवा महोत्सवाच्या उद्घाटनप्रसंगी ते बोलत होते. युवा शक्तीमध्ये मोठे परिवर्तन घडवून आणण्याची क्षमता असून, ही शक्ती राष्ट्रउभारणीसाठी वापरली पाहिजे. विद्यार्थ्यांच्या कला व आवडीला प्रोत्साहन देण्याचे काम शिक्षक आणि गुरुदेव कार्यकर्त्यांनी करावे, असेही त्यांनी सांगितले.
युवा महोत्सव हा केवळ विविध कलाप्रकारांच्या स्पर्धांचा कार्यक्रम नसून विद्यार्थ्यांच्या प्रतिभेला व्यासपीठ देणारा, आत्मविश्वास वाढविणारा आणि व्यक्तिमत्त्व विकासाला चालना देणारा उत्सव आहे. शिक्षण म्हणजे केवळ पुस्तके, परीक्षा आणि गुण नसून विद्यार्थ्यांना विचार करायला शिकविणे, कला व्यक्त करण्याची संधी देणे आणि संस्कृतीशी जोडून ठेवणे महत्त्वाचे आहे, असे सांळुखे यांनी नमूद केले.
यावेळी प्रमुख पाहुणे शशिकांत काळगी यांनी विद्यार्थ्यांमध्ये गायक, नर्तक, अभिनेते, लेखक, चित्रकार तसेच विविध लोककलांमध्ये प्रावीण्य मिळविण्याची क्षमता असल्याचे सांगितले. युवा महोत्सवाच्या माध्यमातून या प्रतिभेला योग्य व्यासपीठ, प्रोत्साहन आणि दिशा मिळते. विद्यार्थ्यांनी निकालाची चिंता न करता आत्मविश्वासाने कलेचे सादरीकरण करावे. मंचावर स्पर्धा असली तरी मनामध्ये मैत्री असावी, असे आवाहन त्यांनी केले.
प्रारंभी महाविद्यालयाचे प्राचार्य कृष्णा रानगर यांनी स्वागत व प्रास्ताविक केले. यावेळी विवेकानंद संस्थेचे माजी अर्थसचिव पी. एस. चव्हाण, आजीव सेवक कृष्णा बिसले, विद्यार्थी विकास मंडळाचे डॉ. एस. जी. घाणे, प्राचार्य डॉ. सुरेश पाटील, सर्वोदय शिक्षण संस्था उमदीचे एस. के. होर्तिकर आदी मान्यवर उपस्थित होते.
शिवाजी विद्यापीठाच्या ४६ व्या जिल्हास्तरीय युवा महोत्सवात सांगली जिल्ह्यातील ५६ महाविद्यालयांमधून १,२८९ विद्यार्थी सहभागी झाले असून विविध कलाप्रकारांतून विद्यार्थी आपली कला सादर करणार आहेत.
कार्यक्रमाचे सूत्रसंचालन डॉ. रामदास बनसोडे व प्रा. लक्ष्मण मासाळ यांनी केले. युवा महोत्सवाचे समन्वयक तथा सांस्कृतिक विभाग प्रमुख डॉ. सतीशकुमार पडोळकर यांनी आभार मानले. कार्यक्रमास विविध महाविद्यालयांचे प्राचार्य, संघ व्यवस्थापक, शिक्षक, शिक्षकेतर कर्मचारी, संस्थांचे पदाधिकारी, विद्यार्थी व कलाकार मोठ्या संख्येने उपस्थित होते.
