टाळ-मृदंगाचा गजर, हरिपाठ आणि विठ्ठल नामाच्या जयघोषाने विसर्जन मिरवणूक भक्तिमय
प्रतिनिधी :
माढेली, दि. २७ : माढेली येथे गणपती विसर्जन सोहळा डीजेच्या कर्णकर्कश आवाजाला फाटा देत पारंपरिक वारकरी संप्रदाय पद्धतीने उत्साहात पार पडला. लहान मुले, ज्येष्ठ नागरिक व आजारी व्यक्तींना ध्वनी प्रदूषणाचा त्रास होऊ नये, यासाठी गावकऱ्यांनी हा स्तुत्य निर्णय घेतला.
विसर्जन मिरवणुकीत टाळ-मृदंगाचा गजर, हरिपाठ आणि विठ्ठल नामाचा जयघोष करण्यात आला. त्यामुळे संपूर्ण वातावरण भक्तिमय व मंगलमय झाले. पारंपरिक पद्धतीने गणेश विसर्जन करून माढेली ग्रामस्थांनी शांतता, भक्तिभाव आणि सामाजिक बांधिलकीचा संदेश दिला.
गावकऱ्यांनी घेतलेला हा उपक्रम ध्वनी प्रदूषण टाळण्याबरोबरच पारंपरिक संस्कृतीचे जतन करणारा असून, इतर गावांसाठीही प्रेरणादायी ठरत आहे.
