सायंकाळी अचानक पावसाचा जोर वाढला; नागरिकांची धावपळ
पुणे प्रतिनिधी :
पुणे : पुणे शहराच्या उत्तर भागातील धानोरी आणि विश्रांतवाडी परिसरात सोमवारी सायंकाळच्या सुमारास विजांच्या कडकडाटासह जोरदार पावसाने हजेरी लावली. अचानक पावसाचा जोर वाढल्याने काही काळ नागरिकांची धावपळ झाली.
दिवसभर उकाड्याचे वातावरण असताना सायंकाळी आकाशात ढगांची गर्दी झाली. त्यानंतर विजांचा कडकडाट सुरू होऊन काही मिनिटांतच जोरदार सरी कोसळल्या. पावसामुळे काही ठिकाणी रस्त्यांवर पाणी साचले.
भारतीय हवामान विभागाने मध्य महाराष्ट्रासह पुणे शहरात मेघगर्जना, विजांचा कडकडाट आणि वादळी वाऱ्यासह पावसाची शक्यता वर्तविली होती.
दरम्यान, विजांचा कडकडाट होत असताना नागरिकांनी मोकळ्या जागेत, झाडाखाली किंवा विजेच्या खांबाजवळ थांबणे टाळावे आणि आवश्यक ती खबरदारी घ्यावी, असे आवाहन करण्यात आले आहे.
