ठरलेल्या वेळेत जेवण करून कर्मचाऱ्यांनी वेळेवर कामावर हजर राहण्याची नागरिकांची मागणी
प्रतिनिधी : सरकारी कार्यालयांमध्ये जेवणाच्या वेळेच्या नावाखाली नागरिकांना तासन्तास प्रतीक्षा करावी लागत असल्याच्या तक्रारी होत आहेत. ठरावीक वेळेत जेवणाची विश्रांती घेऊन त्यानंतर कर्मचारी वेळेवर कामावर हजर राहावेत, अशी अपेक्षा सर्वसामान्य नागरिकांकडून व्यक्त होत आहे.
खासगी आस्थापनांमध्ये कर्मचारी ठरलेल्या वेळेत जेवणाची विश्रांती घेतात आणि वेळ संपल्यानंतर पुन्हा कामावर रुजू होतात. मात्र, काही सरकारी कार्यालयांमध्ये ‘लंच टाईम’ची निश्चित वेळ स्पष्टपणे दर्शवली जात नसल्याने नागरिकांना गैरसोयीला सामोरे जावे लागते.
दूरवरून येणारे शेतकरी, कामगार आणि सर्वसामान्य नागरिक यांचा वेळ व प्रवासाचा खर्च वाया जाऊ नये, यासाठी सरकारी कार्यालयांमध्ये जेवणाची अधिकृत वेळ दर्शविणारे फलक दर्शनी भागात लावावेत, अशी मागणी होत आहे. ठरलेल्या वेळेचे काटेकोर पालन झाल्यास नागरिकांची गैरसोय कमी होऊन प्रलंबित कामांनाही गती मिळू शकते.
प्रशासनाने याबाबत स्पष्ट सूचना देऊन कार्यालयांमध्ये वेळेची शिस्त राखण्यासाठी आवश्यक कार्यवाही करावी, अशी अपेक्षा नागरिकांकडून व्यक्त होत आहे.
