नदीपात्रातील गाळ काढून जलसाठा वाढविण्यासह बंधाऱ्यांची दुरुस्ती व अवैध पाणीउपशावर नियंत्रणाची नागरिकांची मागणी
मालेगाव, जि. वाशिम : प्रतिनिधी
उन्हाळ्याला सुरुवात होण्यापूर्वीच परिसरातील पाणीटंचाईचे संकट गडद होण्याची चिन्हे दिसू लागली आहेत. मालेगाव परिसरातील जीवनवाहिनी मानल्या जाणाऱ्या चाकातीर्थ नदीच्या पात्रातील पाणीसाठा आटत चालल्याने आगामी काळात नागरिकांना तसेच पशुधनाला पाणीटंचाईचा सामना करावा लागू शकतो, अशी चिंता व्यक्त होत आहे.
चाकातीर्थ नदी परिसरातील पिण्याचे पाणी, सिंचन आणि भूजल पातळी टिकवून ठेवण्यासाठी महत्त्वाची मानली जाते. मात्र नदीपात्रात साचलेला गाळ, जलसाठ्याची घटती क्षमता आणि पाण्याच्या अनियंत्रित उपशामुळे परिस्थिती अधिक गंभीर होण्याची शक्यता नागरिकांनी व्यक्त केली आहे.
नदीपात्रातील गाळ तातडीने काढून पाणी साठवण क्षमता वाढवावी, नदीवरील बंधारे व केटी वेअरची दुरुस्ती करावी, अनधिकृत पाणीउपशावर नियंत्रण आणावे तसेच गावागावातील पाणीपुरवठा योजनांची पाहणी करून आवश्यक उपाययोजना कराव्यात, अशी मागणी नागरिकांकडून करण्यात येत आहे.
उन्हाळ्यात नागरिकांना पिण्याच्या पाण्यासाठी पायपीट किंवा टँकरवर अवलंबून राहण्याची वेळ येऊ नये, यासाठी प्रशासनाने आतापासूनच जलसाठ्याचे नियोजन करावे, अशी अपेक्षा व्यक्त होत आहे. ‘पाणी आडवा, पाणी जिरवा’ या संकल्पनेची प्रभावी अंमलबजावणी करून चाकातीर्थ नदीचा जलसाठा टिकविण्यासाठी तातडीने ठोस उपाययोजना कराव्यात, अशी मागणी ग्रामस्थांकडून होत आहे.
