आधुनिक पशुपालन, स्वच्छ दूध उत्पादन व एकात्मिक शेतीबाबत शेतकरी-पशुपालकांना मार्गदर्शन
धुळे : महात्मा फुले कृषी विद्यापीठांतर्गत कृषी विज्ञान केंद्र, धुळे यांच्या वतीने ‘सेवा संकल्प अभियान’ व ‘स्वच्छता ही सेवा’ पंधरवड्यानिमित्त दोन दिवसीय गोपालन व म्हैस पालन प्रशिक्षण कार्यक्रम उत्साहात पार पडला. पशुआहार, चारा व गोठा व्यवस्थापन, जनावरांचे आरोग्य, लसीकरण, आजार नियंत्रण आणि स्वच्छ दूध उत्पादन याबाबत शेतकरी व पशुपालकांना मार्गदर्शन करण्यात आले.
डॉ. धनराज चौधरी, डॉ. प्रशांत निकम यांनी विविध तांत्रिक विषयांवर मार्गदर्शन केले. प्रशिक्षणादरम्यान सहभागी शेतकरी, पशुपालक, महिला व युवकांना स्वच्छतेची शपथ देण्यात आली.
समारोपप्रसंगी कृषी विज्ञान केंद्राचे वरिष्ठ शास्त्रज्ञ तथा प्रमुख डॉ. दिनेश नांद्रे यांनी वातावरणातील बदल आणि एकात्मिक शेती पद्धतीचे महत्त्व सांगितले. अध्यक्षस्थानावरून धुळे शासकीय कृषी महाविद्यालयाचे अधिष्ठाता डॉ. राहुल देसले यांनी शेतीला दुग्ध व्यवसायाची जोड देऊन आधुनिक तंत्रज्ञानाचा वापर केल्यास शेतकऱ्यांची आर्थिक उन्नती होण्यास मदत होईल, असे सांगितले.
कार्यक्रमाचे संचालन डॉ. धनराज चौधरी यांनी केले. प्रशिक्षणाला परिसरातील शेतकरी व पशुपालकांचा उत्स्फूर्त प्रतिसाद मिळाला.
