दोडामार्ग : पिकुळे येथील पाणलोट क्षेत्रांतर्गत बांधण्यात आलेल्या बंधाऱ्यांच्या कामात आर्थिक गैरव्यवहार व निकृष्ट दर्जाचे काम झाल्याचा आरोप सामाजिक कार्यकर्ते कृष्णा गोविंद जाधव यांनी केला आहे. या प्रकरणाची उच्चस्तरीय व निष्पक्ष चौकशी करून दोषींवर कारवाई करावी, अशी मागणी त्यांनी गटविकास अधिकारी, पंचायत समिती दोडामार्ग यांच्याकडे निवेदनाद्वारे केली आहे.
यापूर्वीही संबंधित प्रशासनाकडे तक्रारी व पुरावे सादर करूनही ठोस चौकशी झाली नसल्याचा दावा जाधव यांनी केला आहे. शासनाच्या निधीचा गैरवापर झाल्याचे आढळल्यास संबंधित अधिकारी, कर्मचारी किंवा कंत्राटदारांवर कायदेशीर व प्रशासकीय कारवाई करण्यात यावी, अशी मागणी करण्यात आली आहे.
दरम्यान, मागण्यांवर तातडीने कार्यवाही न झाल्यास शुक्रवार, २३ ऑक्टोबर २०२६ पासून पिकुळे ग्रामपंचायत कार्यालयासमोर बेमुदत उपोषण करण्याचा इशारा कृष्णा जाधव यांनी दिला आहे. निवेदनाच्या प्रती जिल्हाधिकारी, सिंधुदुर्ग, मुख्य कार्यकारी अधिकारी, जिल्हा परिषद सिंधुदुर्ग, दोडामार्ग पोलीस ठाणे तसेच ग्रामपंचायत पिकुळे यांना देण्यात आल्या आहेत.
