नीट परीक्षेतील यशानंतर कु. अवनी गायकवाड हिची प्रतिष्ठित वैद्यकीय शिक्षणासाठी निवड; जेतवन परिवाराकडून सत्कार
अंबाजोगाई प्रतिनिधी : अंबाजोगाई येथील डॉ. दिलीप गायकवाड व डॉ. अनुराधा गायकवाड यांची कन्या कु. अवनी दिलीप गायकवाड हिने नीट परीक्षेत उल्लेखनीय यश संपादन करत AIIMS मेडिकल कॉलेज, नागपूर येथे वैद्यकीय शिक्षणासाठी प्रवेश मिळविला आहे.
अवनी हिने मिळविलेल्या या यशामुळे गायकवाड परिवारासह अंबाजोगाई तालुक्याच्या शैक्षणिक क्षेत्रात आनंदाचे वातावरण निर्माण झाले आहे. आई-वडील दोघेही वैद्यकीय क्षेत्रात कार्यरत असल्याने लहानपणापासूनच तिला वैद्यकीय सेवेची प्रेरणा मिळाली. त्याच प्रेरणेतून तिने सातत्यपूर्ण मेहनत आणि अभ्यासाच्या जोरावर वैद्यकीय शिक्षणाच्या दिशेने महत्त्वपूर्ण पाऊल टाकले आहे.
AIIMSसारख्या प्रतिष्ठित संस्थेत प्रवेश मिळविल्याबद्दल अवनीचे सर्व स्तरांतून अभिनंदन होत आहे. वैद्यकीय शिक्षणासाठी ती नागपूरकडे रवाना होत असताना जेतवन परिवाराच्या वतीने तिचा सत्कार करण्यात आला. यावेळी परिवारातील सदस्य उपस्थित होते.
अवनीच्या पुढील शैक्षणिक व वैद्यकीय वाटचालीसाठी शुभेच्छा देत तिच्या यशाबद्दल कौतुक व्यक्त करण्यात आले. तिच्या या यशामुळे अंबाजोगाईच्या शैक्षणिक क्षेत्रातही अभिमानाची भर पडली आहे.
