मराठवाडा मित्र परिवार, नवी मुंबईच्या स्नेहसंमेलनाला विविध क्षेत्रांतील मान्यवरांची उपस्थिती
कळंबोली, पनवेल : वार्ताहर
भारताच्या स्वातंत्र्यानंतरही निजामशाहीच्या अधिपत्याखाली असलेला मराठवाडा १७ सप्टेंबर १९४८ रोजी भारतीय संघराज्यात विलीन झाला. या ऐतिहासिक दिवसाचे स्मरण म्हणून मराठवाडा मुक्ती दिन साजरा केला जातो. यानिमित्ताने मराठवाडा मित्र परिवार, नवी मुंबई यांच्या वतीने मराठवाडा मुक्ती दिन आणि स्नेहसंमेलन सोहळ्याचे आयोजन करण्यात आले होते. हा कार्यक्रम उत्साहपूर्ण आणि आनंदी वातावरणात पार पडला.
नवी मुंबई परिसरात विविध क्षेत्रांत उल्लेखनीय कार्य करणाऱ्या मराठवाड्यातील नागरिकांनी मोठ्या संख्येने उपस्थित राहून कार्यक्रमाची शोभा वाढवली. शैक्षणिक, वैद्यकीय, उद्योग-व्यवसाय, नोकरी तसेच सामाजिक क्षेत्रात कार्यरत असलेल्या मराठवाड्यातील बांधवांचा यावेळी उत्स्फूर्त सहभाग पाहायला मिळाला.
‘मराठवाड्याची माती, मुंबई-नवी मुंबईतील नाती’ या भावनेतून एकत्र आलेल्या सदस्यांमध्ये आपुलकी, स्नेह आणि एकजुटीचे दर्शन घडले. मराठवाडा मित्र परिवाराला १४ वर्षे पूर्ण झाली असून, या माध्यमातून मराठवाड्यातील नागरिकांना एकत्र आणून मराठवाड्याची संस्कृती, परंपरा आणि सामाजिक बांधिलकी जपण्याचे कार्य सातत्याने केले जात आहे.
या कालावधीत संस्थेच्या माध्यमातून गरजू व्यक्तींना मदत, सामाजिक उपक्रम, जनजागृती कार्यक्रम तसेच विविध समाजोपयोगी उपक्रम राबविण्यात आले. भविष्यातही सामाजिक बांधिलकी जपत विविध उपक्रम सुरू ठेवण्याचा निर्धार यावेळी करण्यात आला.
अरविंद जगताप यांचे प्रेरणादायी मनोगत
कार्यक्रमाचे प्रमुख आकर्षण म्हणून प्रसिद्ध लेखक, कवी आणि दिग्दर्शक अरविंद जगताप यांची उपस्थिती लाभली. यावेळी त्यांनी गावाकडून शहरात येऊन शिक्षण, मेहनत आणि जिद्दीच्या जोरावर विविध क्षेत्रांत स्वतःची ओळख निर्माण करणाऱ्या मराठवाड्यातील नागरिकांचे कौतुक केले.
मराठवाड्यातून नवी मुंबईत आलेल्या अनेक नागरिकांनी आपल्या कर्तृत्वाच्या जोरावर या परिसरात मराठवाड्याची वेगळी ओळख निर्माण केली असल्याचे त्यांनी सांगितले. त्यांच्या प्रेरणादायी मनोगताला उपस्थितांनी उत्स्फूर्त प्रतिसाद दिला.
स्नेहसंमेलनाच्या निमित्ताने जुन्या आठवणींना उजाळा देतानाच नव्या पिढीशी संवाद साधण्याची संधी सदस्यांना मिळाली. विविध क्षेत्रांत कार्यरत असलेल्या मराठवाड्यातील नागरिकांना एकत्र आणण्याचे काम मराठवाडा मित्र परिवार सातत्याने करत असल्याचे यावेळी अधोरेखित झाले.
कार्यक्रम यशस्वी करण्यासाठी मराठवाडा मित्र परिवाराच्या कोअर कमिटीतील सदस्यांनी विशेष मेहनत घेतली. नियोजन, आयोजन आणि व्यवस्थापनासाठी सर्व सदस्यांनी घेतलेल्या परिश्रमामुळे स्नेहसंमेलन सोहळा उत्साहपूर्ण वातावरणात यशस्वी झाला.
