हेक्टरी लाखोंची तातडीची मदत, विद्यार्थ्यांची फी माफी, चारा डेपो सुरू करण्यासह प्रलंबित नुकसानभरपाई देण्याची मागणी
आष्टी : प्रतिनिधी
आष्टी तालुक्यातील धामणगाव येथे दुष्काळग्रस्त शेतकरी आणि सर्वसामान्य नागरिकांच्या विविध मागण्यांसाठी गुरुवार, दि. १ ऑक्टोबर २०२६ रोजी सकाळी १० वाजता आंदोलन करण्यात येणार आहे. दुष्काळामुळे निर्माण झालेल्या विविध प्रश्नांकडे शासनाचे लक्ष वेधून तातडीने उपाययोजना करण्याची मागणी या आंदोलनातून करण्यात येणार आहे
दुष्काळामुळे शेतीचे उत्पादन मोठ्या प्रमाणात प्रभावित झाल्याने शेतकरी आर्थिक संकटात सापडला आहे. त्यामुळे दुष्काळग्रस्त शेतकऱ्यांना हेक्टरी लाखो रुपयांची तातडीची आर्थिक मदत देण्यात यावी, तसेच शेतमजुरांना हेक्टरी २५ हजार रुपयांची आर्थिक मदत देण्यात यावी, अशी मागणी करण्यात आली आहे.
विद्यार्थ्यांची फी माफ करण्याची मागणी
दुष्काळाचा परिणाम शेतकरी कुटुंबातील विद्यार्थ्यांच्या शिक्षणावरही होत असल्याने विद्यार्थ्यांची शैक्षणिक फी माफ करावी. तसेच हॉस्टेल आणि मेससाठी शासनाने आर्थिक मदत उपलब्ध करून द्यावी, अशी मागणी आंदोलनाच्या माध्यमातून करण्यात येणार आहे.
पशुधनासाठी चारा डेपो सुरू करा
दुष्काळी परिस्थितीत पशुधनाच्या चाऱ्याचा प्रश्न गंभीर बनला आहे. त्यामुळे शासनाने तातडीने चारा डेपो सुरू करावेत किंवा शेतकऱ्यांच्या खात्यावर चारा अनुदान जमा करावे, अशी मागणी करण्यात आली आहे.
प्रलंबित नुकसानभरपाई तातडीने द्या
मागील वर्षी अतिवृष्टीमुळे शेती, पिके, जनावरे आणि विहिरींचे नुकसान झालेल्या शेतकऱ्यांची नुकसानभरपाई अद्याप प्रलंबित असल्याचा मुद्दाही आंदोलनात उपस्थित करण्यात येणार आहे. तसेच अतिवृष्टीमुळे घरे आणि दुकानांचे नुकसान झालेल्या कुटुंबांना काही प्रमाणात मदत मिळाली असली तरी उर्वरित नुकसानभरपाईचे अनुदान तातडीने वितरित करावे, अशी मागणी करण्यात आली आहे.
दुष्काळग्रस्त शेतकरी, शेतमजूर, विद्यार्थी तसेच नुकसानग्रस्त कुटुंबांच्या विविध प्रश्नांकडे शासनाचे लक्ष वेधण्यासाठी हे आंदोलन आयोजित करण्यात आले आहे. संबंधितांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.
आंदोलनस्थळ : धामणगाव, ता. आष्टी, जि. बीड
दिनांक : गुरुवार, १ ऑक्टोबर २०२६
वेळ : सकाळी १० वाजता
आयोजक : शेतकरी मित्र विजय (अण्णा) गाढवे, तालुका अध्यक्ष, युवक राष्ट्रवादी काँग्रेस पार्टी शरदचंद्र पवार गट
