निपुण अभियान, शैक्षणिक पोर्टल, अध्ययन निष्पत्ती, शिष्यवृत्ती परीक्षा व डिजिटल साधनांच्या प्रभावी वापराबाबत शिक्षकांना मार्गदर्शन
हरळ, दि. ३० (प्रतिनिधी) : जिल्हा परिषद पूर्व प्राथमिक शाळा, हरळ येथे केंद्र रायपाटण अंतर्गत केंद्रस्तरीय शिक्षण परिषद क्र. ४ बुधवार, दि. ३० सप्टेंबर २०२६ रोजी उत्साहपूर्ण वातावरणात पार पडली. सकाळी ११.३० ते सायंकाळी ४.३० या वेळेत झालेल्या या शिक्षण परिषदेत केंद्रातील शिक्षकांनी विविध शैक्षणिक व प्रशासकीय विषयांवर चर्चा करून मार्गदर्शनाचा लाभ घेतला.
शिक्षण परिषदेच्या माध्यमातून निपुण अभियान, शाळानिहाय आढावा, विविध शैक्षणिक पोर्टल तसेच शिक्षणप्रवाहातील बदल याबाबत शिक्षकांना मार्गदर्शन करण्यात आले. विद्यार्थ्यांची शैक्षणिक गुणवत्ता वाढविण्यासाठी नवनवीन उपक्रमांचा प्रभावी वापर कसा करावा, याबाबतही माहिती देण्यात आली.
परिषदेच्या पहिल्या सत्रात ‘निपुण अभियान शाळानिहाय आढावा’ तसेच ‘विविध पोर्टल व शिक्षणप्रवाहातील बदल’ या विषयांवर केंद्रसमन्वयक श्री. किशोर शिनगारे यांनी मार्गदर्शन केले.
दुसऱ्या सत्रात वर्गप्रक्रियेतील सकारात्मक व सुधारात्मक बाबी तसेच शिष्यवृत्ती परीक्षेसंदर्भात मार्गदर्शन करण्यात आले. यावेळी श्री. सुधाकर जाधव (रायपाटण नं. ३), सौ. दिपाली धावडे (रायपाटण नं. १) आणि सौ. शारदा रेडेकर (रायपाटण नं. ५) यांनी मार्गदर्शन केले.
तिसऱ्या सत्रात अध्ययन निष्पत्तीवर आधारित मासिक नियोजन या महत्त्वपूर्ण विषयावर श्री. किशोर चव्हाण (धामणपे) यांनी सर्व वर्गशिक्षक व विषयशिक्षकांना मार्गदर्शन केले.
चौथ्या सत्रात शाळा व्यवस्थापन समितीची पुनर्रचना व पाठपुरावा या विषयावर सौ. मानसी सुर्वे (परुळे नं. ३) यांनी माहिती दिली. शाळा व्यवस्थापन समितीच्या माध्यमातून शाळेच्या विकासासाठी पालक व शिक्षकांचा सहभाग वाढविण्याच्या दृष्टीने आवश्यक बाबींवर चर्चा करण्यात आली.
पाचव्या सत्रात My Gooru App तसेच Room to Read उपक्रमाबाबत माहिती देण्यात आली. श्री. शरद वाशिंबे (परुळे नं. ३) आणि श्री. सुनील भांडेकर यांनी डिजिटल साधनांचा शैक्षणिक प्रक्रियेत प्रभावी वापर करून विद्यार्थ्यांचे अध्ययन अधिक परिणामकारक कसे करता येईल, याबाबत मार्गदर्शन केले.
याशिवाय प्रशासकीय मार्गदर्शन, मासिक कामकाजाचे संकलन, अहवाल लेखन आदी विषयांवरही चर्चा करण्यात आली. या परिषदेमुळे शिक्षकांना शैक्षणिक व प्रशासकीय कामकाजाबाबत आवश्यक दिशा मिळाली.
कार्यक्रमाच्या यशस्वी आयोजनासाठी अहवाल लेखनाची जबाबदारी सौ. अश्विनी माने, मासिक काम संकलनाची जबाबदारी परमेश्वर धुळे आणि आभार प्रदर्शनाची जबाबदारी श्री. रंगराव चौगुले यांनी पार पाडली. फोटो व व्हिडिओ शूटचे काम श्री. शरद वाशिंबे व श्री. सुनील भांडेकर यांनी केले.
केंद्रस्तरीय शिक्षण परिषदेमुळे शिक्षकांना अध्यापन पद्धतीत आवश्यक सुधारणा करण्याबरोबरच विविध शैक्षणिक उपक्रमांचा प्रभावी वापर करण्यासाठी उपयुक्त मार्गदर्शन मिळाले. शिक्षकांनी परिषदेत उत्स्फूर्त सहभाग नोंदवत विविध विषयांवरील चर्चेत सक्रिय सहभाग घेतला.
