नवरात्रोत्सवाच्या पार्श्वभूमीवर रस्त्यावरील खड्डे बुजवून तातडीने दुरुस्ती करण्याची नागरिकांची मागणी
रिसोड (प्रतिनिधी) : रिसोड शहरापासून काही अंतरावर असलेल्या कुळदैवत पिंगळा माता मंदिराकडे जाणाऱ्या रस्त्याची मोठ्या प्रमाणात दुरवस्था झाली असून रस्त्यावर ठिकठिकाणी मोठमोठे खड्डे पडले आहेत. नवरात्रोत्सव सुरू झाल्याने मंदिरात दर्शनासाठी भाविकांची गर्दी होत असताना खराब रस्त्यामुळे भाविकांना मोठ्या गैरसोयीचा सामना करावा लागत आहे.
पिंगळा माता मंदिर हे परिसरातील भाविकांचे श्रद्धास्थान असून नवरात्रोत्सवाच्या नऊ दिवसांत येथे मोठ्या संख्येने भाविक दर्शनासाठी येतात. बाहेरगावातूनही भक्तमंडळी मंदिरात दर्शनासाठी येत असतात. मात्र, मंदिराकडे जाणाऱ्या रस्त्यावर मोठे खड्डे पडल्याने प्रवास करणे कठीण झाले आहे.
काही भाविक नवस किंवा श्रद्धेपोटी अनवाणी पायी मंदिराकडे जातात. रस्त्यावरील दगड, खडी आणि खड्ड्यांमुळे अशा भाविकांना त्रास सहन करावा लागत आहे. विशेषतः लहान मुले आणि ज्येष्ठ नागरिकांना या रस्त्यामुळे अडचणींचा सामना करावा लागू शकतो, अशी चिंता नागरिकांनी व्यक्त केली आहे.
नवरात्रोत्सवाच्या काळात मंदिर परिसरात यात्रा भरत असल्याने भाविकांची संख्या आणखी वाढण्याची शक्यता आहे. त्यामुळे प्रशासनाने तातडीने रस्त्यावरील खड्डे बुजवून रस्ता वाहतुकीस व पायी जाण्यास योग्य करावा, तसेच भाविकांच्या सुरक्षिततेसाठी आवश्यक सुविधा उपलब्ध करून द्याव्यात, अशी मागणी नागरिकांकडून करण्यात येत आहे.
