शहादा महाविद्यालयात जागतिक पर्यटन दिन उत्साहात साजरा; ‘पर्यटन आणि शांतता’ संकल्पनेवर विद्यार्थ्यांना मार्गदर्शन
शहादा, दि. ३० : पूज्य साने गुरुजी विद्याप्रसारक मंडळाच्या कला, विज्ञान व वाणिज्य महाविद्यालय, शहादा येथील भूगोल विभागाच्या वतीने जागतिक पर्यटन दिन उत्साहात साजरा करण्यात आला. यानिमित्त आयोजित कार्यक्रमात प्रा. डॉ. प्रशांत आर. तोरवणे यांनी विद्यार्थ्यांना पर्यटनाचे भौगोलिक, सामाजिक, सांस्कृतिक आणि आर्थिक महत्त्व याविषयी मार्गदर्शन केले.
जागतिक पर्यटन दिनानिमित्त आयोजित कार्यक्रमासाठी ‘पर्यटन आणि शांतता’ या संकल्पनेवर आधारित विविध विषयांवर चर्चा करण्यात आली. पर्यटनामुळे स्थानिक पातळीवर रोजगारनिर्मितीला चालना मिळण्यासोबतच आर्थिक विकास, सांस्कृतिक वारशाचे संवर्धन आणि स्थानिक पर्यटनस्थळांचा शाश्वत विकास साधता येतो, असे प्रा. डॉ. तोरवणे यांनी सांगितले.
विद्यार्थ्यांनी आपल्या परिसरातील स्थानिक पर्यटनस्थळांची माहिती संकलित करून त्यांच्या शाश्वत विकासासाठी पुढाकार घ्यावा, असे आवाहनही त्यांनी केले. पर्यटन क्षेत्राकडे केवळ मनोरंजनाचे साधन म्हणून न पाहता त्यातील रोजगार व आर्थिक विकासाच्या संधींचा अभ्यास करणे आवश्यक असल्याचे त्यांनी स्पष्ट केले.
कार्यक्रमास महाविद्यालयातील प्राध्यापक आणि विद्यार्थी मोठ्या संख्येने उपस्थित होते. कार्यक्रमाचे सूत्रसंचालन व आभार प्रदर्शन प्रा. राहुल व्ही. पाटील यांनी केले.
कार्यक्रमाच्या यशस्वी आयोजनासाठी प्रा. मीना एन. पटेल, प्रा. विकेश पावरा, प्रा. भूषण पाटील, प्रा. गणेश पावरा, प्रा. धिरसिंग वळवी, श्री. सुरेंद्र वळवी आणि श्री. संजय विसावे यांनी विशेष परिश्रम घेतले.
या उपक्रमाबद्दल पूज्य साने गुरुजी विद्याप्रसारक मंडळाचे अध्यक्ष दीपकभाई पाटील, उपाध्यक्ष जगदीश पाटील, समन्वयक प्रा. मकरंद पाटील आणि संचालक मयुरभाई दीपक पाटील यांनी भूगोल विभाग व विद्यार्थ्यांचे कौतुक केले.
