१०८ प्रशिक्षणार्थींचा सहभाग; विविध आस्थापनांमध्ये ५१ प्रशिक्षणार्थींची निवड
शहादा, दि. ३० (प्रतिनिधी) : पूज्य साने गुरुजी विद्या प्रसारक मंडळाच्या औद्योगिक प्रशिक्षण संस्थेत जिल्हा कौशल्य विकास, रोजगार व उद्योजकता मार्गदर्शन केंद्र, नंदुरबार यांच्या संयुक्त विद्यमाने पंडित दीनदयाळ उपाध्याय रोजगार महाकुंभाचे आयोजन उत्साहात करण्यात आले.
या रोजगार महाकुंभात विविध क्षेत्रातील चार नामांकित आस्थापनांनी सहभाग नोंदविला. रोजगाराच्या अपेक्षेने संस्थेतील तसेच परिसरातील एकूण १०८ प्रशिक्षणार्थी सहभागी झाले. सहभागी आस्थापनांच्या प्रतिनिधींनी प्रशिक्षणार्थींची शैक्षणिक पात्रता, तांत्रिक कौशल्ये तसेच मुलाखतीच्या माध्यमातून निवड प्रक्रिया राबविली.
या प्रक्रियेत एकूण ५१ प्रशिक्षणार्थींची विविध आस्थापनांसाठी निवड करण्यात आली. रोजगार महाकुंभाच्या माध्यमातून प्रशिक्षणार्थींना त्यांच्या तांत्रिक कौशल्यांना अनुरूप रोजगाराच्या संधी उपलब्ध झाल्या. तसेच औद्योगिक क्षेत्रातील बदलत्या गरजा, आवश्यक कौशल्ये आणि उपलब्ध रोजगाराच्या संधींबाबत प्रशिक्षणार्थींना मार्गदर्शन मिळाले.
रोजगार महाकुंभाच्या यशस्वी आयोजनासाठी संस्थेचे अध्यक्ष दीपकभाई पाटील, उपाध्यक्ष जगदीश पाटील, समन्वयक प्रा. मकरंद पाटील, संचालक मयूरभाई पाटील, प्राचार्य रविंद्र पाटील, सर्व प्रशिक्षक व कर्मचारी तसेच रोजगार मेळाव्यासाठी सहकार्य करणाऱ्या विविध आस्थापनांच्या प्रतिनिधींनी विशेष परिश्रम घेतले.
प्रशिक्षणार्थींच्या उत्स्फूर्त सहभागामुळे रोजगार महाकुंभाला उत्साहपूर्ण प्रतिसाद मिळाला.
