जलाशयातील पाणीसाठा सिंचनासाठी वापरण्यास मनाई; मोटारपंप, टँकरसह साहित्य जप्त करून गुन्हा दाखल करणार
नांदेड, दि. १ : नांदेड पाटबंधारे विभागाच्या विविध जलाशयांमधील पाणीसाठा पिण्यासाठी आरक्षित ठेवण्यात आला असून, या पाण्याचा अनधिकृत उपसा करून सिंचनासाठी वापर करणाऱ्यांवर कठोर कारवाई करण्यात येणार असल्याचा इशारा जिल्हाधिकारी राहुल कर्डिले यांनी दिला आहे.
नांदेड पाटबंधारे विभाग (उत्तर) अंतर्गत शंकररावजी चव्हाण विष्णुपुरी प्रकल्पातील अन्तेश्वर उच्च पातळी बंधारा, विष्णुपुरी उच्च पातळी बंधारा व रेणापूर सुधा लघु प्रकल्प, तसेच नांदेड पाटबंधारे विभाग (दक्षिण) अंतर्गत उर्ध्व मानार प्रकल्प, लिंबोटी येथील संपूर्ण पाणीसाठा पिण्यासाठी आरक्षित ठेवण्यात आला आहे. या पाणीसाठ्याचा नियोजनानुसार वापर व्हावा आणि अनधिकृत पाणी उपसा रोखण्यासाठी प्रशासनाने संबंधितांना सूचना दिल्या आहेत.
पाटबंधारे विभागाच्या १२ डिसेंबर २०१८ रोजीच्या शासन निर्णयानुसार या आरक्षित पाणीसाठ्याचे नियोजन व अंमलबजावणी करण्यात येत आहे. त्यामुळे संबंधित जलाशयांवरील सर्व परवानाधारक शेतकऱ्यांनी पाणीसाठा केवळ पिण्यासाठी आरक्षित असल्याची नोंद घेऊन मोटारपंप, इंजिन, टँकर अथवा अन्य साधनांद्वारे पाणी उपसा करून सिंचन करू नये, असे आवाहन प्रशासनाने केले आहे.
जलाशय परिसरात असलेले मोटारपंप, इंजिन, टँकर, स्टार्टर, केबल, सर्व्हिस वायर तसेच अन्य साहित्य संबंधितांनी स्वतःहून काढून घ्यावे, असे प्रशासनाने स्पष्ट केले आहे. पाण्याचा अनधिकृत उपसा होत असल्याचे आढळून आल्यास संबंधितांचा विद्युत पुरवठा खंडित करण्यात येणार आहे. तसेच भरारी पथकाद्वारे मोटारपंप, इंजिन, टँकर, स्टार्टर, केबल, सर्व्हिस वायर आदी साहित्य जप्त करून संबंधितांविरुद्ध गुन्हा दाखल करण्यात येणार असल्याचा इशारा देण्यात आला आहे.
पिण्याच्या पाण्यासाठी आरक्षित असलेल्या पाणीसाठ्याचे संरक्षण आणि उपलब्ध पाण्याचे काटेकोर नियोजन करण्यासाठी सर्व संबंधितांनी प्रशासनास सहकार्य करावे, असे आवाहन जिल्हाधिकारी राहुल कर्डिले यांनी केले आहे.
