उंदीरवाडी येथील सावित्रीबाई फुले इंग्लिश मीडियम स्कूलमध्ये स्वच्छ भारत अभियान
(प्रतिनिधी)
उंदीरवाडी येथील सावित्रीबाई फुले इंग्लिश मीडियम स्कूलमध्ये राष्ट्रपिता महात्मा गांधी आणि माजी पंतप्रधान लालबहादूर शास्त्री यांची जयंती उत्साहपूर्ण व प्रेरणादायी वातावरणात साजरी करण्यात आली.
या निमित्ताने विद्यार्थ्यांनी महात्मा गांधी आणि लालबहादूर शास्त्री यांच्या जीवनकार्यावर मनोगत व्यक्त केले. विद्यार्थ्यांच्या सादरीकरणातून सत्य, अहिंसा, साधेपणा, स्वच्छता आणि देशसेवेचा संदेश प्रभावीपणे मांडण्यात आला.
यानंतर प्राचार्या वंदना थोरात यांच्या मार्गदर्शनाखाली ‘स्वच्छ भारत अभियान’ उपक्रम राबविण्यात आला. या उपक्रमात विद्यार्थ्यांनी उत्स्फूर्त सहभाग घेत स्वच्छतेचे महत्त्व, स्वच्छ परिसराची गरज आणि सामाजिक जबाबदारी याबाबत जनजागृती केली.
महात्मा गांधी आणि लालबहादूर शास्त्री यांच्या विचारांचा आदर्श विद्यार्थ्यांच्या मनात रुजविण्यासोबतच स्वच्छता व सामाजिक बांधिलकीची जाणीव निर्माण करणारा हा उपक्रम प्रेरणादायी ठरला.
