समुद्रात उतरलेल्या विद्यार्थ्यांना प्रवाहाने ओढले; बचावकार्यादरम्यान सर्वांना बाहेर काढले, मात्र उपचारापूर्वीच मृत्यू
विशेष प्रतिनिधी
रायगड जिल्ह्यातील श्रीवर्धन तालुक्यातील प्रसिद्ध पर्यटनस्थळ दिवेआगर समुद्रकिनारी गुरुवारी दुर्दैवी दुर्घटना घडली. समुद्रात उतरलेल्या आळंदी येथील आठ विद्यार्थ्यांचा बुडून मृत्यू झाला. या घटनेमुळे दिवेआगरसह आळंदी परिसरात शोककळा पसरली आहे.
प्राथमिक माहितीनुसार, पुणे जिल्ह्यातील आळंदी येथील ‘विनर्स अकॅडमी’ या खासगी शिकवणी वर्गातील अकरावी व बारावी विज्ञान शाखेचे सुमारे ३० ते ४० विद्यार्थी पर्यटनासाठी दिवेआगर येथे आले होते. समुद्रकिनारी काही विद्यार्थी पाण्यात उतरले असताना समुद्राच्या प्रवाहामुळे आठ विद्यार्थी खोल पाण्यात ओढले गेल्याचे सांगण्यात येत आहे.
विद्यार्थी पाण्यात अडकल्याचे लक्षात येताच स्थानिक नागरिक, जीवरक्षक आणि पोलिसांनी तातडीने बचावकार्य सुरू केले. सर्व आठ विद्यार्थ्यांना समुद्रातून बाहेर काढून बोरली प्राथमिक आरोग्य केंद्रात नेण्यात आले. मात्र, वैद्यकीय तपासणीनंतर डॉक्टरांनी त्यांना मृत घोषित केले.
मृत विद्यार्थ्यांची नावे
१. यश किरण वानखेडे
२. सोहम तुकाराम भांडवलकर
३. तन्मय दत्तात्रय वाहिले
४. कौस्तुभ संदीप दौंड
५. कैवल्य वासनकर
६. राजवीर वहिले
७. प्रणव बनसोडे
८. सुमित अहिरे
घटनेची माहिती मिळताच स्थानिक पोलीस, महसूल प्रशासन आणि आरोग्य विभागाचे अधिकारी व कर्मचारी घटनास्थळी दाखल झाले. मृत विद्यार्थ्यांच्या कुटुंबीयांशी प्रशासनाकडून संपर्क साधण्यात आला असून, पुढील कायदेशीर प्रक्रिया सुरू करण्यात आली आहे.
या दुर्घटनेमुळे सहलीसाठी आलेले अन्य विद्यार्थी आणि शिक्षकांनाही मोठा धक्का बसला आहे. दरम्यान, समुद्रकिनारी पर्यटकांनी पाण्यात उतरताना जीवरक्षक व प्रशासनाच्या सूचनांचे पालन करावे, समुद्रातील प्रवाह व पाण्याची खोली यांचा अंदाज नसताना खोल पाण्यात जाणे टाळावे, असे आवाहन प्रशासनाकडून करण्यात आले आहे.
