कळंबोली प्रतिनिधी
कळंबोली-तळोजा जोडरस्त्यालगत रोडपाली येथील स्विगी इन्स्टा मार्टमध्ये कथितरित्या मुदतबाह्य व खराब खाद्यपदार्थ आढळल्याचा दावा करण्यात आला आहे. ग्राहकांकडून तक्रारी प्राप्त झाल्यानंतर शिवसेनेचे जिल्हाप्रमुख तथा नगरसेवक रामदास शेवाळे यांनी शिवसैनिकांसह मार्टमध्ये पाहणी केली. त्यानंतर कळंबोली पोलिसांसह अन्न व औषध प्रशासनाच्या अधिकाऱ्यांनी घटनास्थळी दाखल होत तपासणी केली.
पाहणीदरम्यान मुदत संपलेली बिस्किटे, किड लागलेला तांदूळ, बुरशी आलेली काजू कतली, खराब आईस्क्रीम, पनीर, पराठे व रोटी तसेच सीताफळे, टोमॅटो आणि अन्य भाजीपाला खराब अवस्थेत आढळल्याचा दावा करण्यात आला. अन्न व औषध प्रशासनाच्या अधिकाऱ्यांनी संबंधित खाद्यपदार्थ व मालाची तपासणी करून आवश्यक नोंदी केल्याची माहिती आहे.
ग्राहकांच्या तक्रारीनंतर रामदास शेवाळे यांनी प्रेम डांगे, गणेश ओतारे, कुमार नलवडे यांच्यासह मार्टमध्ये पाहणी केली. वस्तूंच्या गुणवत्तेबाबत विचारणा झाल्यानंतर पोलिसांना माहिती देण्यात आली. पोलीस उपनिरीक्षक अभयसिंह नाईक, अभयसिंह काळे यांच्यासह पोलीस कर्मचारी घटनास्थळी दाखल झाले. त्यानंतर अन्न व औषध प्रशासनाच्या प्रभारी अधिकारी अंकिता गावडे यांनाही पाचारण करण्यात आले.
‘घरपोच’ खाद्यपदार्थांच्या गुणवत्तेचा प्रश्न ऐरणीवर
ऑनलाईन पद्धतीने किराणा व खाद्यपदार्थ घरपोच मागविण्याचे प्रमाण वाढत असताना वस्तूंची मुदत, पॅकेजची स्थिती, साठवणूक आणि गुणवत्ता यांची नियमित तपासणी होणे आवश्यक असल्याचा मुद्दा या प्रकरणामुळे पुन्हा चर्चेत आला आहे.
“ऑनलाईन वस्तू मागविताना ग्राहक अनेकदा वस्तूंची गुणवत्ता तपासू शकत नाहीत. अन्नपदार्थ, फळे आणि भाज्यांच्या गुणवत्तेचा थेट परिणाम आरोग्यावर होऊ शकतो. रोडपालीतील तपासणीत गंभीर बाबी आढळल्याचा दावा असून, नियमांचे उल्लंघन आढळल्यास संबंधितांवर कारवाई झाली पाहिजे,” असे रामदास शेवाळे यांनी सांगितले. या संदर्भात महापालिका आयुक्तांकडेही तक्रार करण्याचे त्यांनी सांगितले.
या प्रकरणाची सखोल चौकशी करून नियमांचे उल्लंघन आढळल्यास संबंधितांवर कायदेशीर कारवाई करावी, अशी मागणी शेवाळे यांनी केली आहे. यावेळी त्यांच्या समवेत भाजप युवा नेते अमर ठाकूर, भाई जगदीश गायकवाड यांच्यासह शिवसैनिक उपस्थित होते.
दरम्यान, अन्न व औषध प्रशासनाच्या तपासणीत नेमके काय निष्पन्न होते आणि संबंधित खाद्यपदार्थांच्या गुणवत्तेबाबत अंतिम निष्कर्ष काय निघतो, याकडे नागरिकांचे लक्ष लागले आहे.
