रामेश्वर : प्रतिनिधी
रामेश्वर गाव येथे दुष्काळी परिस्थितीमुळे नुकसान झालेल्या पिकांचे पंचनामे करण्यासाठी महसूल, कृषी आणि ग्रामपंचायत प्रशासनातील अधिकारी-कर्मचारी प्रत्यक्ष शेतकऱ्यांच्या बांधावर पोहोचले. ग्राम महसूल अधिकारी राहुल बोरकर, कृषी सहाय्यक दिनेश बहिवाळ आणि ग्रामसेवक अंगद लिंगायत यांनी गावातील विविध शेतांमध्ये जाऊन नुकसानीची पाहणी केली.
यावेळी सोयाबीन, कापूस, तूर, हळद तसेच पाण्याअभावी करपलेल्या केळीच्या पिकांची प्रत्यक्ष पाहणी करून पंचनामे करण्यात आले. पावसाअभावी तसेच सिंचनासाठी पुरेसे पाणी उपलब्ध नसल्याने पिकांचे मोठ्या प्रमाणात नुकसान झाल्याचे शेतकऱ्यांनी प्रशासनाच्या निदर्शनास आणून दिले.
पंचनाम्यावेळी राजू हाके, भागवत शिंदे, शरद खंदारे, सचिन शेंडगे, बंडू आठवले, नामदेव साळुंखे, पांडुरंग भुतनर, बालाजी हाके, कैलास वायकोळे आणि रामेश्वर साळवे यांच्यासह अन्य शेतकरी उपस्थित होते.
उपस्थित शेतकऱ्यांनी सर्वच पिकांचे जवळपास शंभर टक्के नुकसान झाल्याचा दावा करत शासनाकडून तातडीने दुष्काळी मदत व नुकसानभरपाई मिळावी, अशी मागणी केली. पंचनाम्यांच्या अहवालानंतर शासनाकडून शेतकऱ्यांना आवश्यक मदत मिळण्याची अपेक्षा व्यक्त होत आहे.
