रोजगार सहाय्यकांचा तहसीलदार व गटविकास अधिकाऱ्यांना निवेदनातून इशारा
फलटण, दि. ३० सप्टेंबर २०२६ (प्रतिनिधी) : महात्मा गांधी राष्ट्रीय ग्रामीण रोजगार हमी योजनेच्या (मनरेगा) कामकाजासाठी गावपातळीवर कार्यरत असलेल्या रोजगार सहाय्यकांच्या विविध मागण्यांसाठी महाराष्ट्र राज्य ग्रामरोजगार सहाय्यक विकास युनियनच्या वतीने फलटण तहसीलदार तसेच पंचायत समितीच्या गटविकास अधिकाऱ्यांना निवेदन देण्यात आले. २२ सप्टेंबर २०२६ रोजी जारी करण्यात आलेला शासन निर्णय रद्द करावा, तसेच प्रलंबित मानधन अदा करावे, अशी मागणी यावेळी करण्यात आली.
युनियनच्या म्हणण्यानुसार, रोजगार सहाय्यक गेल्या २४ महिन्यांपासून मानधन मिळाले नसतानाही मनरेगा योजनेच्या अंमलबजावणीसाठी आपली जबाबदारी पार पाडत आहेत. मात्र, शासनाने २२ सप्टेंबर २०२६ रोजी जारी केलेल्या शासन निर्णयामुळे रोजगार सहाय्यकांमध्ये नाराजी निर्माण झाली असून, हा निर्णय जाचक असल्याचा आरोप युनियनने केला आहे.
रोजगार सहाय्यकांच्या प्रमुख मागण्या
युनियनने निवेदनातून पुढील मागण्या केल्या आहेत—
- २२ सप्टेंबर २०२६ रोजीचा शासन निर्णय तातडीने रद्द करावा.
- ३ ऑक्टोबर २०२४ चा शासन निर्णय लागू करून त्यानुसार ऑक्टोबर २०२४पासूनचे थकीत मानधन अदा करावे.
- रोजगार सहाय्यकांना सुरक्षा कवच व आवश्यक सुविधा उपलब्ध करून द्याव्यात.
- मागण्या मान्य न झाल्यास १ ऑक्टोबर २०२६पासून बेमुदत काम बंद आंदोलन सुरू करण्यात येईल.
युनियनने निवेदनात म्हटले आहे की, ग्रामीण भागातील बेरोजगारांना रोजगार उपलब्ध करून देण्यासाठी रोजगार सहाय्यक महत्त्वाची भूमिका बजावत असताना त्यांनाच दीर्घकाळ मानधन मिळालेले नाही. त्यामुळे त्यांच्या कुटुंबांच्या दैनंदिन, शैक्षणिक आणि प्रापंचिक खर्चावर परिणाम होत असल्याचे निवेदनात नमूद करण्यात आले आहे.
“२२ सप्टेंबर २०२६चा शासन निर्णय रद्द करून ३ ऑक्टोबर २०२४च्या शासन निर्णयानुसार ऑक्टोबर २०२४ ते सप्टेंबर २०२६ या कालावधीतील थकीत मानधन रोजगार सहाय्यकांच्या वैयक्तिक खात्यावर जमा करावे. मागण्या मान्य न झाल्यास बेमुदत काम बंद आंदोलन करण्यात येईल,” असा इशारा युनियनने दिला आहे.
यावेळी महाराष्ट्र राज्य ग्रामरोजगार सहाय्यक विकास युनियनचे फलटण तालुका अध्यक्ष संतोष सुळ, उपाध्यक्ष कालिदास गोडसे, सचिव अमोल गावडे, कोषाध्यक्ष गौतम भोसले, कार्याध्यक्ष मंगेश शिंदे, सहसचिव सुधीर यादव, सहकोषाध्यक्ष राजेंद्र गोफणे, महिला संघटक रोहिणी कदम, सल्लागार बापूराव घुले, गटप्रमुख शरद जाधव, प्रवक्ते सागर पिसाळ, सोशल मीडिया प्रमुख प्रमोद खरात, दिनेश कांबळे आदी रोजगार सहाय्यक मोठ्या संख्येने उपस्थित होते.
