मंदिर, शाळा, ग्रामपंचायत परिसरासह रस्त्यांची स्वच्छता; राष्ट्रसंत तुकडोजी महाराज व संत गाडगे महाराजांच्या विचारांना उजाळा
मलका गुडा, ता. माहूर, जि. नांदेड | दि. १ सप्टेंबर २०२६ | प्रतिनिधी : राष्ट्रीय स्वच्छता अभियानांतर्गत मलका गुडा येथे ग्रामस्वच्छता मोहीम उत्साहात राबविण्यात आली. महात्मा गांधी यांच्या स्वच्छतेच्या विचारांपासून प्रेरणा घेत ग्रामस्थांनी गावातील विविध सार्वजनिक ठिकाणांची स्वच्छता केली.
या मोहिमेत ग्रामपंचायत कार्यालय, जिल्हा परिषद शाळा तसेच गावातील सरदार पाप नागोड मंदिर, राष्ट्रसंत तुकडोजी महाराज मंदिर, श्री संतोषी माता मंदिर आणि श्री हनुमान मंदिर परिसराची स्वच्छता करण्यात आली. याशिवाय गावातील रस्ते व सार्वजनिक परिसरही स्वच्छ करण्यात आला.
या स्वच्छता मोहिमेत मलका गुडा ग्रामपंचायतीचे उपसरपंच सुमित कन्नलवार, ग्रामपंचायत सदस्य आनंदा बोडलवार पाटील, भारत मडावी, पत्रकार संतोष निळकंठवार, मिलिंद पडलवार, गजानन कन्नलवार, अजय किनाके, उत्तम देवकर, गंगाधर राजुरकर, भारत सिडाम, प्रकाश आत्राम यांच्यासह ग्रामस्थांनी सहभाग घेतला.
यावेळी राष्ट्रसंत तुकडोजी महाराज आणि संत गाडगे महाराज यांच्या स्वच्छता व समाजप्रबोधनाच्या विचारांना उजाळा देण्यात आला. भारत मडावी यांनी संतांच्या विचारांची माहिती उपस्थित ग्रामस्थांना दिली. स्वच्छ गाव, सुंदर गाव आणि निरोगी गावासाठी प्रत्येक नागरिकाने स्वच्छतेची जबाबदारी स्वीकारावी, असा संदेश यावेळी देण्यात आला.
गावातील सार्वजनिक ठिकाणे, मंदिरे, शाळा आणि रस्त्यांची स्वच्छता करण्यासाठी ग्रामस्थांनी एकत्रितपणे पुढाकार घेतल्याने मोहिमेला उत्स्फूर्त प्रतिसाद मिळाला. या उपक्रमासाठी ग्रामस्थांनी सहभागी सर्वांचे आभार मानले.
