आयुष्मान आरोग्य मंदिर कुंभारगावचे यश; संपूर्ण आरोग्य पथकाच्या एकजुटीचे फलित
इंदापूर प्रतिनिधी : प्राथमिक आरोग्य केंद्र शेटफळगडे अंतर्गत येणाऱ्या कुंभारगाव उपकेंद्र (आयुष्मान आरोग्य मंदिर, ता. इंदापूर, जि. पुणे) याला राष्ट्रीय गुणवत्ता हमी मानक अर्थात NQAS मध्ये ८९.९४ टक्के गुण मिळाले आहेत. इंदापूर तालुक्यात NQAS मानांकन मिळविणारे हे पहिलेच उपकेंद्र ठरले असून, या यशामुळे आरोग्य विभागाच्या शिरपेचात मानाचा तुरा रोवला गेला आहे.
NQAS मानांकनाची घोषणा जिल्हा व्हिडिओ कॉन्फरन्समध्ये झाल्यानंतर कुंभारगाव उपकेंद्राने हे आव्हान गांभीर्याने स्वीकारले. जिल्हा परिषद पुणेचे मुख्य कार्यकारी अधिकारी गजानन पाटील, जिल्हा आरोग्य अधिकारी डॉ. रामचंद्र हंकारे, जिल्हा माताबाल संगोपन अधिकारी तथा NQAS नोडल अधिकारी डॉ. दीपक साळुंखे आणि इंदापूर तालुका आरोग्य अधिकारी डॉ. सुरेखा पोळ यांच्या मार्गदर्शनाखाली तयारीला सुरुवात करण्यात आली.
नवीन उपकेंद्र असल्याने सुरुवातीपासून विविध पातळ्यांवर काम करत समुदाय आरोग्य अधिकारी डॉ. कीर्ती कैलास व्यवहारे यांनी सर्वांच्या सहकार्याने उपकेंद्राच्या कामकाजात आवश्यक सुधारणा केल्या. स्वच्छता, रेकॉर्ड, सेवा गुणवत्ता, आवश्यक सुविधा तसेच NQAS निकषांची पूर्तता करण्यासाठी विशेष प्रयत्न करण्यात आले.
या प्रवासात आरोग्य विस्तार अधिकारी संतोष बाबर, तालुका आरोग्य सहाय्यक आप्पा बंडगर, वैद्यकीय अधिकारी डॉ. स्नेहल कारंडे व डॉ. मदने यांचे मार्गदर्शन लाभले. आरोग्य सेवक बाबासाहेब मोरे यांनी सुरुवातीपासून सातत्याने पाठपुरावा व प्रोत्साहन दिले.
आरोग्य सेविका स्वाती लोंढे यांनी लसीकरण तसेच गर्भवती महिलांना गुणवत्तापूर्ण सेवा देण्यासोबत आशा स्वयंसेविका वैशाली मोरे, कोमल कोळेकर, अनिता काशीद, जयश्री परकाळे आणि रंजना कुताळ यांच्या सहकार्याने स्वच्छता, रेकॉर्ड तयार करणे व प्रश्नोत्तर सराव आदी कामे पूर्ण केली.
याशिवाय CHO डॉ. मृदुला जगताप, रेणुका कुलकर्णी, आरोग्य सहाय्यक भोपळे, चाबुकस्वार, पवार, आरोग्य सहायिका बीटे सिस्टर व जाधव सिस्टर, क्लार्क मोरे मॅडम, प्रयोगशाळा अधिकारी पाळंदे मॅडम, फार्मसी ऑफिसर मानसी, ब्लॉक फॅसिलिटेटर शितल गायकवाड, आरोग्य सेवक प्रशांत रणधीर, पाठक दादा, गणेश बंडगर, मारुती गायकवाड तसेच मयुरेश घडशी यांनी महत्त्वपूर्ण सहकार्य केले. सलग १५ दिवस उपकेंद्रात राहून बोर्ड लावण्यापासून दस्तऐवज तयार करण्यापर्यंत विविध कामांमध्ये त्यांनी सहभाग घेतला.
ग्रामपंचायत कुंभारगावचे पदाधिकारी, ग्रामसेविका आणि ग्रामस्थांनी दिलेल्या आर्थिक मदतीबरोबरच मानसिक पाठबळाबद्दलही आरोग्य विभागाच्या वतीने कृतज्ञता व्यक्त करण्यात आली. तसेच रोटरी क्लब ऑफ भिगवणच्या वतीने आयुष्मान आरोग्य मंदिर कुंभारगाव परिसरात वृक्षारोपण करण्यात आले. NQAS मानांकनासाठी आवश्यक हर्बल गार्डन तयार करण्यासाठीही क्लबचे सहकार्य लाभले.
या यशाबद्दल प्रतिक्रिया व्यक्त करताना, “हे यश एकट्या व्यक्तीचे नसून संपूर्ण प्राथमिक आरोग्य केंद्राच्या टीमच्या एकजुटीचे फलित आहे,” अशी भावना व्यक्त करण्यात आली.
