अनैतिक संबंधातूनच तानाजी गायकवाडचा खून
जाब विचारण्यासाठी शेतात गेल्याने वाद; दगड व फरशीने ठेचले
मुख्य आरोपी पोलिसांच्या ताब्यात; साथीदार फरार, ३ ऑक्टोबरपर्यंत पोलिस कोठडी
धराशिव जिल्हा प्रतिनिधी :-लाडलेसाब नदाफ
उमरगा तालुक्यातील भुयार चिंचोली येथे ३५ वर्षीय तानाजी गायकवाड यांचा दगड व फरशीने ठेचून खून केल्याची घटना बुधवार, दि. ३० सप्टेंबर रोजी पहाटेच्या सुमारास उघडकीस आली होती. या प्रकरणाचा अवघ्या २४ तासांत मुरूम पोलिसांनी छडा लावला असून, अनैतिक संबंधाच्या कारणातून हा खून झाल्याची माहिती पोलिस तपासात समोर आली आहे.
घटनेची माहिती मिळताच मुरूम पोलिसांनी घटनास्थळी धाव घेत पाहणी केली. यावेळी तानाजी गायकवाड यांचा दगड व फरशीने ठेचून खून करण्यात आल्याचे प्रथमदर्शनी निदर्शनास आले. पोलिसांनी घटनास्थळाचा पंचनामा करून मृतदेह शवविच्छेदनासाठी रुग्णालयात पाठविला.
प्राथमिक तपासादरम्यान पोलिसांना काटेवाडी येथील निशांत अंकुश पांढरे याच्यावर संशय आल्याने त्याला ताब्यात घेण्यात आले. चौकशीदरम्यान निशांत याने मित्र आशिष आण्णाराव गुरुळे याच्या मदतीने मंगळवारी रात्री सुमारे ११ वाजण्याच्या सुमारास तानाजी गायकवाड यांचा खून केल्याची कबुली दिल्याची माहिती पोलिसांनी दिली. या प्रकरणातील आशिष गुरुळे हा सध्या फरार असून, पोलिस त्याचा शोध मुरूम पोलिस घेत आहेत.
पोलिस तपासात समोर आलेल्या माहितीनुसार, मयत तानाजी गायकवाड यांच्या पत्नीशी निशांत पांढरे याचे गेल्या काही महिन्यांपासून संबंध होते.
या संबंधांना तानाजी यांचा विरोध होता. याबाबत जाब विचारण्यासाठी तानाजी हे निशांतच्या शेतात गेले होते. त्यावेळी दोघांमध्ये जोरदार वाद झाला. या वादातून निशांत व त्याचा साथीदार आशिष यांनी तानाजी यांच्यावर दगड व फरशीने हल्ला केल्याची माहिती तपासात पुढे आली आहे.
दरम्यान, जिल्हा पोलिस अधीक्षक रितू खोकर व उमरगा उपविभागीय पोलिस अधिकारी प्रशांत संपते यांच्या मार्गदर्शनाखाली मुरूमचे सहायक पोलिस निरीक्षक गणेश पाटील व त्यांच्या पथकाने तपासाची चक्रे वेगाने फिरवत अवघ्या २४ तासांत या खून प्रकरणाचा उलगडा केला.
मुख्य आरोपी निशांत पांढरे याला न्यायालयात हजर केले असता त्याला ३ ऑक्टोबरपर्यंत पोलिस कोठडी सुनावण्यात आली आहे. फरार आरोपी आशिष आण्णाराव गुरुळे याचा शोध सुरू असून, पुढील तपास मुरूम पोलिस करीत आहेत.
