कळंबोली प्रतिनिधी |श्रीनाथ(गणेश) लाड: कळंबोली येथील SBI सर्कल परिसरात सकाळी आणि सायंकाळच्या गर्दीच्या वेळेत मोठ्या प्रमाणात वाहतूक कोंडी होत असल्याने नागरिक, वाहनचालक आणि विद्यार्थ्यांना नाहक त्रास सहन करावा लागत आहे. कळंबोली शहराच्या मध्यभागी असणाऱ्या भारत पेट्रोलियमच्या पेट्रोल पंपावर CNG भरण्यासाठी येणाऱ्या वाहनांच्या लांबच लांब रांगा रस्त्यापर्यंत येत असल्याने या कोंडीत मोठी भर पडत असल्याचा आरोप नागरिकांनी केला आहे.
या पेट्रोल पंपापासून SBI सर्कलपर्यंत CNG वाहनांच्या रांगा लागतात. त्यातच पेट्रोल पंपातून बाहेर पडणारी काही वाहने विरुद्ध दिशेने येत असल्याने वाहतुकीचा प्रश्न अधिक गंभीर बनत आहे. तसेच या ठिकाणी होणारी बेकायदा पार्किंग या मुळे सकाळी कार्यालयीन वेळेत तसेच सायंकाळी कामावरून परतणाऱ्या नागरिकांच्या गर्दीच्या वेळी या परिसरात वाहने अक्षरशः ठप्प होण्याची परिस्थिती निर्माण होते.
बँक, शाळांमुळे परिसरात मोठी वर्दळ
SBI सर्कल परिसरात बँका तसेच शाळा असल्याने या भागात दिवसभर मोठ्या प्रमाणात नागरिकांची आणि वाहनांची वर्दळ असते. अशा परिस्थितीत CNGसाठी रस्त्यावर लागणाऱ्या वाहनांच्या रांगा आणि त्यातून होणारी वाहतूक कोंडी यामुळे वाहनचालकांची मोठी गैरसोय होत आहे. वाहतूक कोंडीमुळे अपघाताचा धोकाही निर्माण होत असल्याची चिंता नागरिकांनी व्यक्त केली आहे.
पंप कर्मचाऱ्यांच्या भूमिकेवर नागरिक नाराज
CNGसाठी वाहनांची मोठी रांग लागलेली असताना वाहतूक सुरळीत करण्यासाठी पेट्रोल पंप प्रशासनाकडून कर्मचारी नियुक्त करणे आवश्यक असल्याचे नागरिकांचे म्हणणे आहे. मात्र, गर्दीच्या वेळेत पंप परिसरात वाहतूक नियोजनासाठी कोणताही कर्मचारी उपस्थित नसल्याची तक्रार नागरिकांनी केली आहे.
याबाबत काही नागरिकांनी पेट्रोल पंप कर्मचाऱ्यांकडे विचारणा केली असता, ‘हे आमचे काम नाही, हे वाहतूक पोलिसांचे काम आहे. तुम्ही वाहतूक पोलिसांकडे तक्रार करा,’ अशा प्रकारची उत्तरे दिली जात असल्याचा आरोप नागरिकांनी केला आहे. या कथित उर्मट भूमिकेमुळे नागरिकांमध्ये नाराजी व्यक्त होत आहे.
पेट्रोल कमी मिळत असल्याच्या तक्रारी; मशीनच्या अचूकतेवर संशय
दरम्यान, याच पेट्रोल पंपावर पेट्रोल भरताना अपेक्षेपेक्षा कमी इंधन मिळत असल्याच्या तक्रारी काही वाहनचालकांकडून करण्यात येत आहेत. पेट्रोल वितरण करणाऱ्या मशीनमध्ये काही तांत्रिक गडबड आहे का, याची तपासणी करण्याची मागणी नागरिकांनी केली आहे. या तक्रारींची संबंधित विभागाने गांभीर्याने दखल घेऊन पेट्रोल पंपाच्या मशीनची तपासणी व आवश्यक असल्यास कारवाई करावी, अशी मागणी होत आहे.
तसेच पेट्रोल कमी मिळत असल्याच्या तक्रारींची निष्पक्ष चौकशी करून मशीनची तपासणी करण्यात यावी आणि दोष आढळल्यास संबंधित पेट्रोल पंपावर कठोर कारवाई करावी, अशी मागणीही नागरिकांकडून होत आहे.
वाहतूक पोलिस आणि प्रशासनाने तातडीने दखल घ्यावी
गर्दीच्या वेळेत पेट्रोल पंपाबाहेर CNG वाहनांच्या रांगा रस्त्यावर येणार नाहीत, यासाठी योग्य नियोजन करावे. तसेच पंपातून बाहेर पडणारी वाहने विरुद्ध दिशेने येणार नाहीत, यासाठी आवश्यक उपाययोजना कराव्यात, अशी मागणी नागरिकांकडून होत आहे. पेट्रोल पंप प्रशासनाने वाहतूक नियोजनासाठी कर्मचारी नियुक्त करावा आणि नियमांचे उल्लंघन होत असल्यास संबंधितांवर कारवाई करावी, अशीही मागणी करण्यात येत आहे.
कळंबोली SBI सर्कल परिसरातील हा वाहतूक कोंडीचा प्रश्न दिवसेंदिवस गंभीर होत असताना वाहतूक पोलिस, पालिका प्रशासन आणि संबंधित ‘पेट्रोल पंप व्यवस्थापनाने संयुक्तपणे पाहणी करून कायमस्वरूपी उपाययोजना करावी, अशी अपेक्षा नागरिकांनी व्यक्त केली आहे.
