पाथरी (प्रतिनिधी) अहमद अन्सारी पाथरी परभणी
सोनपेठ सामाजिक वनीकरण विभागाच्या वतीने वाघाळा येथे बोगस रोपवाटिका दाखवून अकुशल मजुरीचे पैसे उचलल्याची बातमी विविध माध्यमांत प्रसिद्ध झाली होती. याचा राग मनात धरून भाजपच्या तालुकाध्यक्षाने पत्रकारावर प्राणघातक हल्ला केल्याची धक्कादायक घटना बुधवार, दि. ७ ऑगस्ट रोजी सायंकाळी पाथरी-वाघाळा मार्गावर घडली.
पत्रकार किरण घुंबरे हे दुचाकीवरून जात असताना चाटे पिंपळगाव जवळ नियोजनबद्धपणे त्यांची दुचाकी अडवण्यात आली. भाजप तालुकाध्यक्ष स्वराज घुंबरे आणि अमोल घुंबरे यांनी त्यांना ढकलून खाली पाडले.
“तुझ्या पोराने का निवेदन दिले? तू आमचे वैयक्तिक खूप नुकसान करत आहेस, तुला आता जिवंत ठेवून उपयोग नाही,” असे म्हणत लोखंडी गजाने डोक्यात, छातीवर, कमरेत आणि हातावर जबर मारहाण करून जीवे मारण्याचा प्रयत्न करण्यात आल्याचा आरोप जखमी पत्रकाराने केला आहे.
यावेळी त्याच मार्गावरून जाणाऱ्या प्रवाशांनी वेळीच हस्तक्षेप केल्यामुळे पत्रकार किरण घुंबरे यांचे प्राण वाचले. हल्ला करून दोन्ही हल्लेखोर घटनास्थळावरून पसार झाले.
घटनेची माहिती मिळताच पाथरी पोलिसांनी तात्काळ घटनास्थळी भेट दिली. उपस्थित नागरिकांनी वाघाळा प्राथमिक आरोग्य केंद्राची रुग्णवाहिका बोलावून जखमी पत्रकाराला प्रथम पाथरी ग्रामीण रुग्णालयात दाखल केले. मात्र मार गंभीर असल्याने त्यांना पुढील उपचारासाठी परभणी येथे हलवण्यात आले आहे.
सामाजिक वनीकरण विभागाच्या बोगस रोपवाटिकेविरोधात निवेदन देण्यात आले होते, याच राग धरून हा हल्ला झाल्याचे सांगण्यात येत आहे. पत्रकारावरील या भ्याड हल्ल्याचा सर्व स्तरातून तीव्र निषेध व्यक्त होत असून हल्लेखोरांवर कठोर कारवाई करण्याची मागणी होत आहे.
