महाराष्ट्र धनगर वधू-वर सूचक मंडळ व आदिशक्ती बहुउद्देशीय संस्थेचा पुढाकार; विवाह इच्छुक वधू-वरांसह पालकांना सहभागी होण्याचे आवाहन
प्रतिनिधी :
सांगली : महाराष्ट्र धनगर वधू-वर सूचक मंडळ, म्हसवड आणि आदिशक्ती बहुउद्देशीय संस्था, म्हसवड यांच्या संयुक्त विद्यमाने रविवार, दि. १८ ऑक्टोबर २०२६ रोजी सांगली येथे जिल्हास्तरीय धनगर वधू-वर परिचय व पालक मार्गदर्शन मेळाव्याचे आयोजन करण्यात आले आहे. सकाळी ११.३० ते दुपारी ४ वाजेपर्यंत हा मेळावा होणार आहे.
हा मेळावा हरिप्रिया मल्टीपर्पज हॉल, अहिल्या स्मारकाजवळ, राजे मल्हार होळकर चौक, सुतगिरणी रोड, सांगली येथे आयोजित करण्यात आला आहे. मेळाव्याचे उद्घाटन कुरुंदवाडच्या लोकनियुक्त नगराध्यक्षा मनिषा उदय डांगे यांच्या हस्ते होणार असून, सांगली-मिरज-कुपवाड महानगरपालिकेचे उपमहापौर गजानन मगदूम कार्यक्रमाच्या अध्यक्षस्थानी राहणार आहेत.
महाराष्ट्र धनगर वधू-वर सूचक मंडळाच्या माध्यमातून पुणे, सांगली, सातारा, कोल्हापूर यांसह महाराष्ट्रातील विविध भागांत नोंदणीकृत वधू-वरांसाठी नियमितपणे परिचय मेळावे आयोजित केले जातात. तसेच नोंदणीकृत वधू-वरांची माहिती असलेली परिचय पुस्तिकाही उपलब्ध करून दिली जाते.
या संस्थेच्या माध्यमातून महाराष्ट्रासह कर्नाटक राज्यातही सामाजिक उपक्रम राबविण्यात येत आहेत. विवाह इच्छुक वधू-वर आणि त्यांच्या पालकांना प्रत्यक्ष भेटीगाठी, संवाद आणि परिचयाची संधी उपलब्ध करून देणे हा या मेळाव्याचा प्रमुख उद्देश आहे.
आगामी काळात दिवाळीपासून डिसेंबरपर्यंत महाराष्ट्रातील विविध भागांत वधू-वर परिचय मेळावे आयोजित करण्याचे नियोजन असल्याची माहिती संस्थेच्या वतीने देण्यात आली.
सांगली व परिसरातील विवाह इच्छुक वधू-वरांनी तसेच त्यांच्या पालकांनी या मेळाव्यात सहभागी होऊन लाभ घ्यावा, असे आवाहन आयोजकांच्या वतीने करण्यात आले आहे.
