धामोरी कोपरगाव तालुका प्रतिनिधी.. अथर्व वाणी
कोपरगाव तालुक्यातील धामोरी गावचे भूमिपुत्र तथा सुप्रसिद्ध अँकर आणि उत्कृष्ट सूत्रसंचालक प्रदीप आहिरे यांच्या कलाक्षेत्रातील उल्लेखनीय योगदानाची दखल घेत त्यांना यंदाचा लोककवी वामनदादा कर्डक पुरस्कार प्रदान करण्यात आला. उत्कृष्ट सूत्रसंचालनाच्या क्षेत्रात उल्लेखनीय कामगिरी केल्याबद्दल स्वरनाद संगीत विद्यालय, रुई (ता. राहाता) आणि कलाविष्कार यांच्या वतीने हा मानाचा पुरस्कार त्यांना देण्यात आला.
विविध सामाजिक, सांस्कृतिक, शैक्षणिक तसेच कला क्षेत्रातील कार्यक्रमांना आपल्या प्रभावी आवाजाने, ओघवत्या निवेदनशैलीने आणि उत्स्फूर्त सूत्रसंचालनाने रंगत आणण्याचे काम प्रदीप आहिरे सातत्याने करत आहेत. कार्यक्रमाचे स्वरूप आणि प्रसंगाचे गांभीर्य लक्षात घेऊन उपस्थितांशी प्रभावी संवाद साधण्याची त्यांची शैली विशेष उल्लेखनीय मानली जाते. आपल्या सूत्रसंचालनातून त्यांनी रसिकांच्या मनात वेगळी ओळख निर्माण केली आहे..
या पुरस्कार सोहळ्याप्रसंगी सुप्रसिद्ध शाहीर सुनीलदादा खरे, कवी-साहित्यिक शरदजी शेजवळ सर, सामाजिक कार्यकर्ते गागरे दादा तसेच स्वरनाद संगीत विद्यालयाच्या संस्थापिका आरती ताई खरात यांच्या शुभहस्ते प्रदीप आहिरे यांचा सन्मान करण्यात आला. यावेळी मान्यवरांनी त्यांच्या सूत्रसंचालनातील योगदानाचे कौतुक करत भविष्यातही कला व सांस्कृतिक क्षेत्रात अशीच उल्लेखनीय कामगिरी करण्यासाठी शुभेच्छा दिल्या.
लोककवी वामनदादा कर्डक यांच्या नावाने मिळालेला हा पुरस्कार प्रदीप आहिरे यांच्या कलाविषयक कार्याला मिळालेली विशेष पावती असून, हा सन्मान त्यांच्या कुटुंबीयांसह धामोरी गावासाठीही अभिमानाची बाब ठरली आहे. गावातील भूमिपुत्राने आपल्या कर्तृत्वाच्या जोरावर मिळविलेल्या या सन्मानामुळे धामोरीच्या शिरपेचात आणखी एक मानाचा तुरा रोवला गेला आहे.
प्रदीप आहिरे यांना हा पुरस्कार मिळाल्याचे वृत्त समोर येताच मित्रपरिवार, नातेवाईक, ग्रामस्थ, कला क्षेत्रातील सहकारी तसेच विविध सामाजिक व सांस्कृतिक क्षेत्रातील मान्यवरांकडून त्यांच्यावर अभिनंदनाचा वर्षाव होत आहे. त्यांच्या या यशाबद्दल सर्व स्तरांतून कौतुक व्यक्त करण्यात येत असून, त्यांच्या पुढील कलाविषयक वाटचालीसाठी शुभेच्छा दिल्या जात आहेत.
