जत (प्रतिनिधी): जत तालुक्याच्या राजकीय क्षितिजावर भारतीय जनता पक्षाने आपला दबदबा कायम राखत अभूतपूर्व यश संपादन केले आहे. जिल्हा परिषद आणि पंचायत समितीच्या निवडणुकीत भाजपने विरोधकांना धोबीपछाड दिली असून, ९ पैकी ८ जिल्हा परिषद गटांवर ‘कमळ’ फुलवले आहे. या विजयामुळे आमदार गोपीचंद पडळकर यांचे नेतृत्व पुन्हा एकदा तालुक्यात सर्वमान्य असल्याचे सिद्ध झाले आहे.
भाजपचे वर्चस्व: जिल्हा परिषदेच्या ८ जागा आणि पंचायत समितीच्या १८ पैकी १२ जागा जिंकत स्पष्ट बहुमत मिळवले.
काँग्रेसला पंचायत समितीच्या ४ जागांवर समाधान मानावे लागले, तर राष्ट्रवादी (अजित पवार गट) ला जिल्हा परिषदेची १ आणि पंचायत समितीच्या २ जागा मिळाल्या.
तर सत्ताधारी शिवसेना (शिंदे गट) या निवडणुकीत खातेही उघडू शकला नाही.
जिल्हा परिषदेचे विजयी उमेदवार:
विजयी उमेदवार गट/क्षेत्र पक्ष
शिवाजी खिल्लारे शेगाव भाजप
रमेश देवर्षी मुचंडी भाजप
सुनील पवार बना भाजप
स्वप्नाली मासाळ डफळापूर भाजप
शिल्पा जीवनावर बिळूर भाजप
येळगोंडा तोरणे उमदी भाजप
कविता पाटील संख भाजप
सरदार पाटील दरीबडची भाजप
सावित्री रवी पाटील जाडरबोबलाद राष्ट्रवादी (अ.प.)
प्रशासकीय यंत्रणा व बंदोबस्त:
निवडणूक निर्णय अधिकारी अजयकुमार नष्टे यांच्या मार्गदर्शनाखाली जुन्या धान्य गोदामात अत्यंत पारदर्शक पद्धतीने मतमोजणी पार पडली. शहरात २-३ किलोमीटर परिसरात बॅरिकेड्स लावून कडेकोट पोलीस बंदोबस्त तैनात करण्यात आला होता.
निकाल जाहीर होताच जत शहरातील छत्रपती शिवाजी महाराज चौक भाजप कार्यकर्त्यांच्या घोषणाबाजीने दणाणून गेला. “कोण आली रे कोण आली, भाजपची वाघीण आली” आणि “गोपीचंद पडळकर झिंदाबाद” अशा घोषणा देत कार्यकर्त्यांनी फटाक्यांची आतिशबाजी आणि गुलालाची उधळण केली.
