प्रतिनिधी : गोरक्षनाथ राक्षे
अजित पवार यांच्या विमान अपघातामागे घातपाताचा संशय असल्याचा खळबळजनक दावा आमदार रोहित पवार यांनी केला आहे. विमानाचा ब्लॅक बॉक्स जळण्यावरून आणि तांत्रिक त्रुटींवरून त्यांनी डीजीसीएच्या तपासावर गंभीर प्रश्नचिन्ह उपस्थित केले आहेत.
आमदार रोहित पवार यांनी केलेल्या आरोपाला दुजारा देणारी भूमिका अजित पवार यांचे लहान मुलगा जय पवार यांनी घेतली आहे. महाराष्ट्रातील जनतेला आपल्या हृदयाला हादरवून टाकणाऱ्या या दुर्घटनेचे संपूर्ण, पारदर्शक आणि निर्विवाद सत्य जाणून घेण्याचा हक्क आहे, अशी भूमिका जय पवार यांनी समाज माध्यमांतील संदेशाद्वारे घेतली आहे.
अपघातग्रस्त विमान कंपनी व्हीएसआरला तात्काळ उड्डाणे चालविण्यास बंदी घालून, त्यांच्या विमानांच्या देखभालीत झालेल्या संभाव्य गंभीर गैर व्यवहाराबद्दल सखोल आणि निष्पक्ष चौकशी केलीच पाहिजे, अशी मागणीही जय पवार यांनी केली आहे.
आमदार रोहित पवार अजित पवार यांच्या विमान अपघाताबाबत सतत संशय व्यक्त करीत आहेत. बुधवारी झालेल्या पत्रकार परिषदेत त्यांनी व्हीएसआर कंपनीवर तत्काळ बंदी घालण्याची मागणी केली होती. आता जय पवार यांनीही अशीच मागणी केल्यामुळे रोहित पवार यांच्या मागणी दुजोरा मिळाला आहे. अजित पवार यांच्या कुटुंबातून पहिल्यांदाच जाहीरपणे विमान अपघाताबाबत भाष्य करण्यात आले आहे. त्यामुळे जय पवार यांचा समाज माध्यमांतील संदेश महत्त्वपूर्ण मानला जात आहे.
