परभणी प्रतिनिधी : – रमेश मुलगीर
ताडबोरगाव येथील जिल्हा परिषद शाळेत १९ फेब्रुवारी रोजी छत्रपती शिवाजी महाराज यांची जयंती अत्यंत उत्साहात आणि चैतन्यमय वातावरणात साजरी करण्यात आली. विद्यार्थ्यांनी सादर केलेल्या भाषणे व सांस्कृतिक कार्यक्रमांनी उपस्थितांची मने जिंकली.
कार्यक्रमाच्या अध्यक्षस्थानी शालेय व्यवस्थापन समितीचे अध्यक्ष श्री. बाबाराव रावजी जोगदंड होते. प्रमुख पाहुणे म्हणून समितीच्या उपाध्यक्षा सौ. लताताई पठाडे, सदस्य श्री. गजाननराव पठाडे व सौ. शोभाताई पठाडे यांची उपस्थिती होती. यावेळी गावातील प्रतिष्ठित नागरिक व महिला मोठ्या संख्येने उपस्थित होत्या.
कार्यक्रमाची सुरुवात शिवरायांच्या प्रतिमेच्या पूजनाने करण्यात आली. त्यानंतर विद्यार्थ्यांनी छत्रपती शिवाजी महाराजांच्या गौरवशाली जीवनावर ओघवती भाषणे सादर केली. पोवाडे तसेच शिवकालीन इतिहासावर आधारित विविध नृत्यप्रकारांनी कार्यक्रमात रंगत आणली. महाराजांच्या शौर्याचा वारसा आपल्या भाषणातून मांडताना विद्यार्थ्यांनी ‘जय भवानी, जय शिवाजी’च्या घोषणांनी परिसर दणाणून सोडला.
हा कार्यक्रम यशस्वी करण्यासाठी मुख्याध्यापक श्री. अनिल सावळे यांच्या मार्गदर्शनाखाली शाळेतील सर्व शिक्षकांनी विशेष परिश्रम घेतले. शिक्षक वृंद जुनेद खान, जुनेद अन्सारी, श्री. दत्तात्रेय जोजारे, श्री. शिवाजी राखुंडे, आदिल, सय्यद मजीद, मोहम्मद कलीम तसेच शिक्षिका श्रीमती नंदा शिंदे, मालती देशपांडे, सारिका करंडे व अर्चना पांचाळ यांच्या नियोजनामुळे सोहळा शिस्तबद्ध पद्धतीने पार पडला.
उपस्थित मान्यवरांनी विद्यार्थ्यांच्या सादरीकरणाचे व शालेय व्यवस्थापनाच्या नियोजनाचे तोंडभरून कौतुक केले.
