मानवत प्रतिनिधी :- रमेश मुलगीर
सकल मराठा समाज बांधवांच्या मागण्यांचे निवेदन प्रशासनास सादर
जि. बुलडाणा येथील चिखला (काकड) गावात छत्रपती शिवाजी महाराज यांच्या स्मारक हटविण्याचा प्रयत्न केल्याची घटना उघडकीस आली आहे. या प्रकारामुळे परिसरात संतापाची लाट उसळली असून संबंधित गावगुंडांवर कठोर कारवाई करण्याची मागणी करण्यात आली आहे.
सकल मराठा समाजाच्या वतीने महाराष्ट्र राज्याचे मुख्यमंत्री व गृहमंत्री यांना तहसील कार्यालय मानवत मार्फत निवेदन सादर करण्यात आले. गावातील काही समाजकंटकांनी जाणूनबुजून छत्रपती शिवाजी महाराजांचे स्मारक उखडून टाकण्याचा प्रयत्न केल्याचे निवेदनात नमूद करण्यात आले आहे.
या प्रकाराला गावातील एका महिलेने विरोध दर्शविल्यानंतर संबंधितांनी त्या महिलेला मारहाण, शिवीगाळ व विनयभंग केल्याचा गंभीर आरोप करण्यात आला आहे. तिचे कपडे फाडून अपमान केल्याचेही निवेदनात नमूद आहे. छत्रपती शिवाजी महाराजांनी महिलांच्या सन्मानाचे व स्वाभिमानाचे धडे दिले असताना अशा प्रकारची घटना घडणे ही महाराष्ट्राच्या संस्कृतीला काळिमा फासणारी बाब असल्याचे निवेदनात म्हटले आहे.
सदर प्रकरणी तात्काळ संबंधितांवर मोक्का अंतर्गत कारवाई करण्यात यावी, अन्यथा तीव्र आंदोलन छेडण्यात येईल, असा इशाराही सकल मराठा समाजाच्या वतीने देण्यात आला आहे. कायदा व सुव्यवस्थेचा प्रश्न निर्माण झाल्यास सर्वस्वी जबाबदारी प्रशासनावर राहील, असे निवेदनात स्पष्ट करण्यात आले आहे.
निवेदनावर शिवप्रेमी व सकल मराठा समाज बांधवांच्या स्वाक्षऱ्या आहेत.
