परभणी प्रतिनिधी :- रमेश मुलगीर
23 फेब्रुवारी 2026 रोजी के. के. एम. महाविद्यालयातील इंग्रजी विभागाच्या वतीने “व्यावसायिक विकासामध्ये इंग्रजी भाषेची भूमिका” या विषयावर एकदिवसीय प्रादेशिक कार्यशाळेचे यशस्वी आयोजन करण्यात आले. या कार्यशाळेचा उद्देश विद्यार्थ्यांच्या करिअर प्रगतीसाठी आणि व्यावसायिक विकासासाठी इंग्रजी भाषेचे महत्त्व अधोरेखित करणे हा होता. यावेळी विविध महाविद्यालयांतील प्राध्यापक आणि विद्यार्थी मोठ्या संख्येने उपस्थित होते.
कार्यशाळेच्या प्रमुख वक्त्या म्हणून नूतन महाविद्यालय, सेलू येथील सहयोगी प्राध्यापक डॉ. निर्मला पद्मावत यांनी मार्गदर्शन केले. आपल्या भाषणात त्यांनी इंग्रजी ही जागतिक संवादाची भाषा असून कॉर्पोरेट क्षेत्र, उच्च शिक्षण आणि स्पर्धा परीक्षा यामध्ये तिचे वाढते महत्त्व स्पष्ट केले. विद्यार्थ्यांनी प्रभावी संवादकौशल्य, सार्वजनिक वक्तृत्व आणि व्यावसायिक लेखनकौशल्य विकसित करण्याची गरज त्यांनी अधोरेखित केली.
कार्यक्रमाच्या अध्यक्षस्थानी महाविद्यालयाचे प्राचार्य डॉ. भास्कर मुंडे हे होते. आपल्या अध्यक्षीय भाषणात त्यांनी विद्यार्थ्यांना पारंपरिक अभ्यासक्रमाबरोबरच व्यवहारिक भाषिक कौशल्ये आत्मसात करण्याचे महत्त्व सांगितले. तसेच अशा उपयुक्त शैक्षणिक उपक्रमांचे आयोजन केल्याबद्दल त्यांनी आयोजकांचे कौतुक केले.
कार्यक्रमाचे सूत्रसंचालन इंग्रजी विभागप्रमुख डॉ. सुभाष शिंदे यांनी केले. यावेळी मंचावर डॉ. सुनीता कुकडे, डॉ. सत्यनारायण राठी, डॉ. सारिका सावंत, राधिका देशपांडे, दत्ता काळे आदी उपस्थित होते. दत्ता नावडकर यांनी आभार प्रदर्शन केले. ही कार्यशाळा विद्यार्थ्यांसाठी प्रेरणादायी आणि मार्गदर्शक ठरली.
