शहर स्वच्छ ठेवणाऱ्या हातांची डॉक्टरांकडून काळजी; आयुक्त सत्यम गांधी व महापौर धीरज सूर्यवंशी यांचा पुढाकार
सांगली-मिरज-कुपवाड शहराच्या स्वच्छतेसाठी अहोरात्र कष्ट करणाऱ्या आरोग्य व घनकचरा व्यवस्थापन विभागातील कर्मचाऱ्यांसाठी युनिक इन्स्टिट्यूट ऑफ क्रिटिकल केअर (UICC) तर्फे विशेष मोफत आरोग्य तपासणी शिबिराचे आयोजन करण्यात आले. महानगरपालिकेचे आयुक्त श्री. सत्यम गांधी आणि उपायुक्त सौ. स्मृती पाटील यांच्या विशेष मार्गदर्शनाखाली हा उपक्रम यशस्वीरित्या पार पडला.शहर स्वच्छतेचा डोलारा सांभाळणाऱ्या घंटागाडी कर्मचारी आणि स्वच्छता कर्मचाऱ्यांचे आरोग्य सक्षम राहावे, या उद्देशाने ‘क्षमता बांधणी’ (Capacity Building) कार्यक्रमांतर्गत हे पाऊल उचलण्यात आले. या शिबिरात UICC च्या अनुभवी डॉक्टरांच्या पथकाने कर्मचाऱ्यांची सविस्तर आरोग्य तपासणी केली. यामध्ये डॉ. परमशेट्टी, डॉ. रियाज मुजावर, डॉ. गांधी आणि डॉ. टकले यांनी सहभाग घेऊन कर्मचाऱ्यांना वैद्यकीय सल्ला दिला. यावेळी बोलताना डॉ. परमशेट्टी म्हणाले की, “स्वच्छता कर्मचारी हा शहर आरोग्याचा खरा पाया आहे. हे कर्मचारी निरोगी राहिले तरच शहराची सेवा अधिक प्रभावी होईल. भविष्यातही मनपा कर्मचाऱ्यांसाठी सातत्याने वैद्यकीय सेवा देण्यास आमची संस्था तत्पर राहील.”कार्यक्रमादरम्यान आयुक्त श्री. सत्यम गांधी यांनी एक महत्त्वाची सूचना मांडली. त्यांनी महिला कर्मचाऱ्यांसाठी विशेष आरोग्य तपासण्या आणि इतर आवश्यक वैद्यकीय चाचण्यांचा समावेश या सेवेमध्ये करण्याची विनंती केली. डॉक्टरांच्या टीमने या सूचनेचे स्वागत करत, भविष्यात या सर्व सेवा प्राधान्याने उपलब्ध करून देण्याची ग्वाही दिली. नूतन महापौर श्री. धीरज सूर्यवंशी यांनी यावेळी आपले मनोगत व्यक्त केले. ते म्हणाले,
आरोग्य व स्वच्छता विभागातील कर्मचारी हे शहर व्यवस्थेचा कणा आहेत. ते समाजाचा महत्त्वाचा आधार असून, त्यांच्या आरोग्याची काळजी घेणे ही प्रशासनाची जबाबदारी आहे. हे कर्मचारी निरोगी राहिल्यास शहराच्या विकासाला अधिक गती मिळेल.”याप्रसंगी महापौर श्री. धीरज सूर्यवंशी, उपमहापौर श्री. गजानन मगदूम, सभागृह नेते श्री. संदीप आवटी तसेच नवनिर्वाचित नगरसेवकांचा सत्कार करण्यात आला. या कार्यक्रमास महानगरपालिकेचे वरिष्ठ अधिकारी, कर्मचारी आणि हॉस्पिटलचा वैद्यकीय कर्मचारी वर्ग मोठ्या संख्येने उपस्थित होता.
