व्यसनमुक्ती उपक्रमात योगदानाबद्दल मुख्याध्यापिका माणिक नागावे यांचा गौरव….
प्रतिनिधी :- दरिकांत कोळेकर. सारथी महाराष्ट्राचा न्युज..
कुरुंदवाड :- न्यू इंग्लिश स्कूल शेडशाळ च्या मुख्याध्यापिका श्रीमती माणिक नागावे मॅडम यांचा शाळा स्तरावर व्यसनमुक्तीचे उपक्रम प्रभावीपणे राबवल्याबद्दल गुण गौरव करण्यात आला. नशाबंदी मंडळ महाराष्ट्र राज्य (कोल्हापूर जिल्हा) विद्यापीठाच्या राष्ट्रीय सेवा योजना, लोकनेते बाळासाहेब देसाई अध्यासन यांच्या संयुक्त विद्यमाने कोल्हापूर येथे आयोजित व्यसनमुक्ती विषयक कार्यशाळेत त्यांना सन्मानित करण्यात आले.
श्रीमती नागावे यांनी आपल्या कार्यकाळात विविध उपक्रम, जनजागृती कार्यक्रम, व्याख्याने व संवादाच्या माध्यमातून विद्यार्थ्यांमध्ये नशामुक्ती विषयी जागरूकता निर्माण करण्याचे सातत्यपूर्ण काम केले आहे. शाळा व महाविद्यालयीन वयातील विद्यार्थ्यांमध्ये वाढत्या व्यसनाधीनतेला आळा घालण्यासाठी त्यांनी राबवलेले उपक्रम नशाबंदीची शपथ, नशाबंदीवरील व्याख्याने व मार्गदर्शनपर कार्यक्रम,होळी व्यसनाची,एक राखी व्यसनमुक्तीची, व्यसनमुक्ती वरील पोस्टर प्रदर्शन, चित्रकला स्पर्धा इत्यादी उपक्रम प्रेरणादायी ठरले आहेत.त्यांच्या या सामाजिक योगदानाची दखल घेत कार्यशाळेच्या निमित्ताने जिल्हा संघटक सुरेश सकटे व नशाबंदी मंडळ महाराष्ट्र राज्याचे मुख्य संघटक व चिटणीस श्री. अमोल मडामे यांच्या हस्ते प्रशस्तीपत्र व भारतीय संविधान कलम 47 ची प्रत देऊन त्यांचा सन्मान करण्यात आला.
व्यसनमुक्त समाजनिर्मितीसाठी शिक्षण संस्थांची भूमिका महत्त्वाची असून, अशा उपक्रमांमुळे विद्यार्थ्यांमध्ये आरोग्यदायी जीवनशैली विषयी सकारात्मक दृष्टीकोन विकसित होतो, असे मत यावेळी उपस्थित मान्यवरांनी व्यक्त केले. कार्यशाळेत व्यसनांचे दुष्परिणाम, प्रतिबंधात्मक उपाय तसेच युवकांमध्ये जनजागृती कशी वाढवता येईल, यावर मार्गदर्शन करण्यात आले. विविध शाळा, महाविद्यालयांतील शिक्षक, स्वयंसेवक आणि विद्यार्थी मोठ्या संख्येने उपस्थित होते.
