मानवत प्रतिनिधी :- रमेश मुलगीर
मानवत, दि. २७ फेब्रुवारी २०२६ — मानवत येथील के. के. एम. महाविद्यालयात आज महान मराठी कवी व साहित्यिक कुसुमाग्रज यांच्या जयंतीनिमित्त विशेष कार्यक्रमाचे आयोजन करण्यात आले. हा कार्यक्रम मोठ्या उत्साहात आणि प्रेरणादायी वातावरणात पार पडला.
कार्यक्रमाच्या अध्यक्षस्थानी महाविद्यालयाचे उपप्राचार्य डॉ.के. जी. हुगे हे उपस्थित होते. यावेळी मूल्यशिक्षण समितीचे प्रमुख डॉ. पंडित मोरे, कार्यक्रमाचे संयोजक डॉ. विनायक जाधव तसेच प्रा. संजय सूर्यवंशी, डॉ.कैलास बोरुडे यांच्यासह महाविद्यालयातील प्राध्यापक, शिक्षक व शिक्षकेतर कर्मचारी मोठ्या संख्येने उपस्थित होते.
या जयंती कार्यक्रमात प्रमुख वक्ते म्हणून प्रा. संजय सूर्यवंशी यांनी कुसुमाग्रज यांच्या जीवनकार्यावर आणि त्यांच्या साहित्यसंपदेवर सविस्तर मार्गदर्शन केले. त्यांनी कुसुमाग्रज यांच्या कवितांमधील सामाजिक जाणीव, मानवतावादी विचार आणि स्वातंत्र्य, समता व न्याय या मूल्यांचे महत्त्व विद्यार्थ्यांना समजावून सांगितले. त्यांच्या साहित्याने मराठी भाषेला मिळालेली समृद्धी आणि समाजजागृतीतील योगदान यावरही त्यांनी प्रकाश टाकला.
कार्यक्रमाच्या सुरुवातीला कुसुमाग्रज यांच्या प्रतिमेला पुष्पहार अर्पण करून अभिवादन करण्यात आले. कार्यक्रमाचे प्रास्ताविक आणि अध्यक्षीय मनोगत डॉ. के. जी. हुगे यांनी व्यक्त केले. त्यांनी विद्यार्थ्यांनी साहित्यिकांच्या विचारांचे अनुकरण करून जीवनात सकारात्मक मूल्ये जोपासावीत, असे आवाहन केले.
कार्यक्रमाचे सूत्रसंचालन व आभार प्रदर्शन संयोजक डॉ. विनायक जाधव यांनी केले. त्यांनी कार्यक्रम यशस्वी करण्यासाठी सहकार्य करणाऱ्या सर्व प्राध्यापक, कर्मचारी आणि विद्यार्थ्यांचे आभार मानले.
या कार्यक्रमामुळे महाविद्यालयात साहित्यप्रेमी वातावरण निर्माण झाले असून विद्यार्थ्यांना कुसुमाग्रज यांच्या विचारांपासून प्रेरणा मिळाली.
