नितेश गट्टीवार चामोर्शी(गडचिरोली )दि.१मार्च:चामोर्शी येथील आर ए कंपनी ने महिलांना अगरबत्ती उद्योग सुरु करून उद्योजक बनन्याचे स्वप्न दाखवून लाखों रुपयाची फसवणूक केल्याच्या प्रकरणात संबंधिता विरोधात कारवाईच्या मागणीसाठी 23 फेब्रुवारीपासून गडचिरोली जिल्हाधिकारी कार्यालयासमोर उपोषण सुरू केले होते. या उपोषणाची गांभीर्याने दखल घेत गडचिरोली विधानसभा क्षेत्राचे माजी आमदार तथा भाजप आदिवासी मोर्चाचे प्रदेशाध्यक्ष डॉ. देवराव होळी यांनी उपोषणस्थळी भेट देत संबंधित महिलांशी सविस्तर चर्चा केली.माजी आमदार तथा आदिवासी मोर्चा चे प्रदेशाध्यक्ष डॉ. होळी यांनी तत्काळ पोलीस व महसूल प्रशासनाशी संवाद साधून प्रकरणात लवकरात लवकर योग्य ती कारवाई करण्याबाबत पाठपुरावा केला. प्रशासनाच्या वतीने गडचिरोलीचे उपविभागीय पोलीस अधीक्षक सुरज जगताप, पोलीस निरीक्षक विनोद चव्हाण तसेच चामोर्शीचे पोलीस निरीक्षक दीपक डोंब यांनी उपोषणस्थळी उपस्थित राहून संबंधित फसवणूक प्रकरणात एका महिन्याच्या आत आरोपीविरुद्ध ठोस कारवाई करण्यात येईल, असे लेखी आश्वासन दिले.प्रशासनाच्या या सकारात्मक भूमिकेनंतर व माजी आमदार डॉ. होळी यांच्या मध्यस्थीमुळे संबंधित महिलांनी उपोषण मागे घेतले. यावेळी माजी आमदार डॉ. होळी यांच्या हस्ते ज्यूस पाजून उपोषणाची सांगता करण्यात आली.या प्रकरणात प्रशासनाने दिलेले लेखी आश्वासन आणि लोकप्रतिनिधींनी घेतलेली तत्परतेची दखल यामुळे पीडित महिलांना न्याय मिळण्याची अपेक्षा व्यक्त होत आहे. यावेळी भाजपाचे जेष्ठ नेते प्रमोद पिपरे, निखिल धोडरे, किरमे व स्थानिक नागरिकांन उपस्थित होते. यावेळी उपोषणकर्त्या महिलांनी या निर्णयाचे स्वागत करत प्रशासनाने दिलेल्या मुदतीत ठोस कारवाई व्हावी, अशी अपेक्षा व्यक्त केली आहे.
