सोलापूर (प्रतिनिधी) : निमगाव (मा.) येथील जिल्हा परिषद प्राथमिक शाळेच्या विद्यार्थ्यांनी ५ मार्च २०२६ रोजी शैक्षणिक क्षेत्रभेटीचे आयोजन करून शेती व दुग्ध व्यवसायाचा प्रत्यक्ष अनुभव घेतला. या क्षेत्रभेटीदरम्यान विद्यार्थ्यांनी प्रगतशील बागायतदार विठ्ठल मुकणे यांच्या शेतमळ्याला तसेच शाळा व्यवस्थापन समिती सदस्य सिद्धेश्वर शिंदे यांच्या दुग्ध व्यवसायाला भेट दिली.
विद्यार्थ्यांनी प्रथम जय शंकर मळ्यातील महादेवाचे दर्शन घेतल्यानंतर चिकू बागेत भेट दिली. नैसर्गिक पद्धतीने पिकलेल्या चिकूंचा आस्वाद घेत विद्यार्थ्यांनी साठ वर्षे जुन्या चिंचेच्या झाडाचा अभ्यास केला. झाडाचे वय, बुंध्याचा घेर, उंची, सावलीचा विस्तार, झाडावरील पक्षी-कीटक तसेच चिंचेच्या बियांचा विविध व्यवसायांमध्ये होणारा उपयोग याबाबत विद्यार्थ्यांनी प्रश्नोत्तरांद्वारे माहिती घेतली.
तसेच परिसरातील चिंच, कडूनिंब, नारळ, आंबा, पेरू, बदाम, निलगिरी, पळस, बाभूळ आदी झाडे तसेच शेतातील मिरची, लसूण, कांदा, कोथिंबीर, वांगे, मेथी, पालक आदी पिकांचे निरीक्षण करून विद्यार्थ्यांनी लेखन अभ्यास केला.
यानंतर विद्यार्थ्यांनी सिद्धेश्वर शिंदे यांच्या दुग्ध व्यवसायाला भेट देऊन मुक्त गोठा पद्धती, चारा पिके, चारा कापणी मशीन, दूध काढण्याची मशीन, गाईंच्या खाण्याच्या सवयी तसेच दुधापासून मिळणारे उत्पन्न याविषयी माहिती घेतली. यावेळी विद्यार्थ्यांसाठी खास अल्पोपहाराचीही व्यवस्था करण्यात आली.
क्षेत्रभेटीदरम्यान विद्यार्थ्यांनी नृत्य, कविता, विनोद, कोडी व नकला सादर करून कार्यक्रमात रंगत आणली.
ही क्षेत्रभेट शाळेचे मुख्याध्यापक नंदकिशोर कापसे यांच्या मार्गदर्शनाखाली गायकवाड सर व कुमुदिनी गिड्डे मॅडम यांनी नियोजनपूर्वक पार पाडली. प्रगतशील शेतकरी विठ्ठल मुकणे व सिद्धेश्वर शिंदे यांनी केलेल्या सहकार्याबद्दल शाळेच्या वतीने त्यांचे आभार मानण्यात आले.
