“क्षितिजाला गवसणी घालणाऱ्या स्त्रीशक्तीचा जागर”; जागतिक महिला दिनानिमित्त आयुक्त सत्यम गांधी यांचा शुभेच्छा संदेश “स्वप्नांना पंख देऊन क्षितिजाला गवसणी घालणाऱ्या प्रत्येक स्त्रीचा आज गौरव करण्याचा दिवस आहे. स्त्री ही केवळ कुटुंबाचा आधारस्तंभ नसून ती आधुनिक समाजाची निर्माती आहे,” अशा शब्दांत सांगली-मिरज-कुपवाड महानगरपालिकेचे आयुक्त श्री. सत्यम गांधी यांनी जागतिक महिला दिनानिमित्त शहरातील समस्त माता-भगिनी, महिला अधिकारी आणि कर्मचाऱ्यांना शुभेच्छा दिल्या आहेत.यंदाचा जागतिक महिला दिन “हक्क, न्याय आणि कृती: सर्व महिला आणि मुलींसाठी” (Rights. Justice. Action. For ALL Women and Girls) या संकल्पनेवर आधारित असून, महापालिका प्रशासनाने महिला सक्षमीकरणासाठी विविध स्तरावर पावले उचलली आहेत.आजच्या २१ व्या शतकात महिलांनी केवळ चूल आणि मूल या चौकटीबाहेर पडून तंत्रज्ञान (Technology) आणि शिक्षण (Education) क्षेत्रात क्रांती घडवली आहे. महानगरपालिकेच्या विविध विभागांत तंत्रज्ञान हाताळणाऱ्या महिला कर्मचाऱ्यांपासून ते आरोग्य सेवेतील डॉक्टर आणि परिचारिकांपर्यंत सर्वांचे योगदान शहराच्या प्रगतीत मोलाचे आहे. डिजिटल युगात महिलांची पावले आता अंतराळापर्यंत पोहोचली आहेत, ही अभिमानास्पद बाब आयुक्तांनी आपल्या संदेशात अधोरेखित केली.सांगली-मिरज-कुपवाड महानगरपालिकेत मोठ्या संख्येने महिला अधिकारी , सदस्य आणि कर्मचारी कार्यरत आहेत.शहराला स्वच्छ ठेवण्यासाठी पहाटेपासून रस्त्यावर उतरणाऱ्या महिला स्वच्छता कर्मचाऱ्यांचे कष्ट कौतुकास्पद आहेत.उपायुक्त, सहाय्यक आयुक्त आणि विभाग प्रमुख यांसारख्या महत्त्वाच्या पदांवर महिला अधिकारी आपली कर्तव्ये चोख बजावत आहेत.महापालिका शाळांमधील शिक्षिका आणि आरोग्य केंद्रांमधील महिला कर्मचारी शहराच्या भावी पिढीला घडवत आहेत.जागतिक स्तरावर आजही महिलांना पुरुषांच्या तुलनेत केवळ ६४% कायदेशीर अधिकार प्राप्त आहेत. हे अंतर भरून काढण्यासाठी केवळ कायदे असून चालणार नाही, तर समाजाच्या मानसिकतेत बदल होणे आवश्यक आहे.आयुक्त म्हणाले की, “जागतिक महिला दिन साजरा करणे म्हणजे केवळ एका दिवसाच्या शुभेच्छा नव्हे, तर वर्षभर महिलांच्या सन्मानासाठी आणि प्रगतीसाठी पूरक वातावरण निर्माण करणे होय. आपल्या घरातील आणि समाजातील प्रत्येक मुलीला शिक्षणाची आणि तंत्रज्ञानाची समान संधी देऊन तिला स्वावलंबी बनवणे, हीच खऱ्या अर्थाने महिला दिनाची भेट ठरेल.”या दिनाचे औचित्य साधून सांगली-मिरज-कुपवाड महानगरपालिकेच्या वतीने बुधवार, ११ मार्च २०२६ रोजी बालगंधर्व नाट्यगृह, मिरज येथे दुपारी ३.०० वाजल्यापासून भव्य कार्यक्रमांचे आयोजन करण्यात आले आहे.या कार्यक्रमामध्ये महानगरपालिकेच्या सर्व महिला अधिकारी, पदाधिकारी, सदस्य, कर्मचारी, शिक्षिका, आशा वर्कर आणि ॲडव्हान्स ब्युटी पार्लर प्रशिक्षणार्थी यांचा गौरव सोहळाही आयोजित करण्यात आला आहे. या सोहळ्यासाठी सर्वांनी मोठ्या संख्येने उपस्थित राहावे, असे आवाहन उप-आयुक्त श्रीमती. अश्विनी पाटील यांनी केले आहे.
