सोलापूर जिल्हा प्रतिनिधी
दिनांक – ०९-०३-२०२६
जिल्हा परिषद प्राथमिक शाळा निमगाव माढा येथे आंतरराष्ट्रीय महिला दिन उत्साहात साजरा करण्यात आला. कार्यक्रमाचे अध्यक्षस्थानी मुक्ता महादेव चव्हाण या होत्या.
स्त्री शिक्षणाच्या उद्धारकर्त्या सावित्रीबाई फुले, राजमाता जिजाऊ यांच्या प्रतिमा पूजनाने कार्यक्रमाची सुरुवात झाली.
नवनिर्वाचित तालुका पंचायत समिती सदस्य सौ सोनालीताई मनोज साठे यांना जिल्हा परिषद प्राथमिक शाळेतर्फे शाल, श्रीफळ,मानाचा फेटा, पुष्पहार, देऊन विशेषत्वाने सन्मानित करण्यात आले . पुढे बोलताना सौ साठे म्हणाल्या की शाळेच्या गुणवत्ता विकासात मला शिक्षकांचे खूप योगदान दिसते आहे. इथून पुढे पंचायत समितीच्या माध्यमातून जनतेची सेवा करण्यासाठी विशेषत्वाने या मराठी शाळेच्या भौतिक सुविधा पूर्ण करण्यासाठी मुन्ना (अण्णा )साठे यांच्या साथीने प्रयत्नशील राहीन .
माढा येथील प्रसिद्ध डॉ. सौ. उमा पाटील मॅडम यांनी महिलांचे आरोग्य व सबलीकरण , डॉ.सोनाली देवकुळे मॅडम यांनी कर्करोग , पूजा चव्हाण मॅडम यांनी बचत गटाचे आर्थिक सबलीकरणात महत्त्व, कवयित्री मोहिनी चव्हाण – कोल्हे मॅडम यांनी स्त्रीशक्ती विषयी कविता सादर करून महिलांचे उद्बोधन केले .
तुझा कृष्ण मुरारी माझी छेड काढितो या गवळणी वर सुंदर नृत्य करून इयत्ता तिसरीतील विद्यार्थिनी प्रांजल मुकुंद कदम हिने उपस्थित महिलांना मंत्रमुग्ध केले. त्याबद्दल तिचा पाहुण्यांच्या हस्ते सन्मानही करण्यात आला
सहभागी सर्व महिलांच्या सुंदर हस्ताक्षर ,उखाणे , बादलीत बॉल टाकणं,संगीत खुर्ची या स्पर्धा अत्यंत चुरशीने आणि आनंदी वातावरणात पार पडल्या.
वरील स्पर्धेतील पहिले तीन विजेत्या महिलांना सौ .सोनालीताई साठे सौ. मुक्ता चव्हाण यांचे हस्ते आकर्षक व गृहपयोगी वस्तू बक्षीस म्हणून वितरण करण्यात आली.
बक्षीस वितरणाचा संपूर्ण खर्च गावचे प्रसिद्ध उद्योजक व प्रगतशील बागायतदार श्री महादेव तुकाराम चव्हाण यांनी स्वतः उचलला. यापुढे शाळेला लागणाऱ्या भौतिक गरजेसाठी मदत करणार असल्याचे सांगितले.
तर शाळा व्यवस्थापन समितीच्या उपाध्यक्ष श्रीम.कौसर रसूल पठाण यांनी सर्व उपस्थित महिला व विद्यार्थ्यांना अल्पोपहार दिला.
याप्रसंगी शाळा व्यवस्थापन समितीचे अध्यक्ष श्री अभिजीत वाघमारे, डॉ.आकाश देवकुळे, श्री मुकुंद कदम, श्री सिद्धेश्वर शिंदे तसेच सर्वच वयोगटातील महिला बहुसंख्येने उपस्थित होत्या.
शाळेच्या कलाशिक्षिका श्रीम. कुमुदिनी गिड्डे यांच्या विविधांगी संकल्पनेतून पार पडलेल्या कार्यक्रमाला श्री माधव गायकवाड सर यांनी प्रसंगावधान राखून उत्कृष्टपणे निवेदन करून रंगत आणली.
शाळेचे मुख्याध्यापक श्री नंदकिशोर कापसे यांनी प्रमुख पाहुणे आणि घरातील सर्व कामे सोडून शैक्षणिक क्रांतीसाठी वेळ देणाऱ्या सर्व माता भगिनींचे आभार मानले.
