नांदेड प्रतिनिधी 🖊️
गुरुद्वारा सचखंड बोर्डाचा आर्थिक वर्ष २०२६-२७ साठीचा तब्बल १७० कोटी रुपयांचा अर्थसंकल्प मंजूर करण्यात आला आहे. ही माहिती बोर्डाचे प्रशासक डॉ. स. विजय सतबीर सिंघ यांनी दिली.
दि. २० मार्च २०२६ रोजी श्री गुरु अंगद देव जी यात्री निवास येथील कार्यालयात आयोजित बैठकीत हा अर्थसंकल्प सादर करण्यात आला. या बैठकीत विविध महत्त्वपूर्ण प्रस्ताव मंजूर करण्यात आले असून, विशेषतः शैक्षणिक व सामाजिक विकासावर भर देण्यात आला.
बैठकीत श्री गुरु तेग बहादर साहिब यांच्या नावाने विद्यापीठ स्थापन करण्याचा महत्त्वपूर्ण निर्णय घेण्यात आला. तसेच नांदेड येथील बाफना रोडवरील खालसा हायस्कूलसाठी नवीन सर्व सुविधायुक्त इमारत उभारण्याचे नियोजन करण्यात आले आहे.
ऊर्जा क्षेत्रातही पुढाकार घेत सौरऊर्जा निर्मितीसाठी सोलार प्लांट उभारण्याचा निर्णय घेण्यात आला. विद्यार्थ्यांसाठी विविध शिष्यवृत्ती योजना राबवण्यावर भर देण्यात आला असून, महिलांसाठी मोफत शिक्षण योजना सुरू करण्याचाही प्रस्ताव मांडण्यात आला आहे.
याशिवाय, विविध क्षेत्रांत प्राविण्य मिळवून शिक्षण पूर्ण केलेल्या सुशिक्षित बेरोजगार युवकांसाठी ‘जॉब इन्फॉर्मेशन सेंटर’ सुरू करण्यात आले आहे. हे केंद्र श्री गुरु अर्जन देव जी महाराज यांच्या नावाने श्री हजूर साहिब सार्वजनिक वाचनालयात कार्यरत होणार आहे.
या सर्व सामाजिक व शैक्षणिक उपक्रमांसाठी १७० कोटी रुपयांचा अर्थसंकल्प मंजूर करण्यात आला आहे.
या बैठकीस प्रशासक डॉ. स. विजय सतबीर सिंघ, सल्लागार जसवंत सिंघ (बॉबी), प्र. अधीक्षक रविंदर सिंघ कपुर, सहा. अधीक्षक जयमल सिंघ ढिल्लो, बलविंदर सिंघ फौजी, स्वीय सहाय्यक बबिता कौर चाहेल, लेखापाल सतविंदर सिंघ रामगडिया यांच्यासह इतर मान्यवर उपस्थित होते.
