श्रीक्षेत्र माहूर (प्रतिनिधी): माहूर शहरात विविध जयंती, पुण्यतिथी तसेच इतर उत्सवांदरम्यान लावण्यात येणाऱ्या कर्णकर्कश डीजेमुळे नागरिकांना त्रास होत असल्याने डीजे वाजविण्यास परवानगी देऊ नये, अशी मागणी शिवसेनेचे तालुका संघटक विनोद पाटील सूर्यवंशी यांनी पोलिसांकडे निवेदनाद्वारे केली आहे.
उपविभागीय पोलीस अधिकारी किरण कुमार भोंडवे आणि पोलीस निरीक्षक देविदास चोपडे यांना दिलेल्या निवेदनात त्यांनी नमूद केले की, डीजेच्या मोठ्या आवाजामुळे विशेषतः बालकं, ज्येष्ठ नागरिक तसेच हृदयविकार असलेल्या रुग्णांना मोठ्या प्रमाणात त्रास सहन करावा लागतो. अनेक वेळा अशा आवाजामुळे नागरिकांना तातडीने रुग्णालयात दाखल होण्याची वेळ येते, अशीही चिंता त्यांनी व्यक्त केली.
माहूर हे पवित्र तीर्थक्षेत्र म्हणून जगभर ओळखले जाते. त्यामुळे येथे होणाऱ्या मिरवणुका पारंपरिक वाद्य आणि मंगल वाद्यांच्या माध्यमातूनच काढण्यात याव्यात, तसेच डीजे या साधनावर कायमस्वरूपी बंदी घालावी, अशी मागणीही त्यांनी केली आहे.
तसेच, शहरातील कोणत्याही धार्मिक कार्यक्रम, जयंती किंवा मिरवणुकीमध्ये डीजे वापरण्यास परवानगी देऊ नये आणि माहूरला ‘डीजे मुक्त शहर’ घोषित करण्यात यावे, अशी विनंतीही त्यांनी प्रशासनाकडे केली आहे.
या निवेदनानंतर माहूर शहरात डीजे बंदीबाबत प्रशासन कोणता निर्णय घेते, याकडे नागरिकांचे लक्ष लागले आहे.
