अंदरसुल/ प्रतिनिधी :
ता. येवला येथील जिल्हा परिषद प्राथमिक शाळा, सुरेगाव रस्ता येथे १ मे २०२६ रोजी महाराष्ट्र दिन व आंतरराष्ट्रीय कामगार दिन उत्साहात साजरा करण्यात आला.
कार्यक्रमाची सुरुवात गावात प्रभात फेरी काढून करण्यात आली. यानंतर शाळा पूर्वतयारी अंतर्गत इयत्ता पहिलीमध्ये दाखल होणाऱ्या विद्यार्थ्यांच्या पालकांचा शाळास्तरावर मेळावा घेण्यात आला. यावेळी असाक्षरता निर्मूलनासाठी प्रतिज्ञाही घेण्यात आली.
कार्यक्रमाला शालेय व्यवस्थापन समितीचे अध्यक्ष, उपाध्यक्ष, सर्व सदस्य, शाळाप्रेमी तसेच विद्यार्थ्यांचे पालक मोठ्या संख्येने उपस्थित होते. यावेळी अध्यक्षांनी आपल्या मनोगतातून शिक्षणाचे महत्त्व पटवून दिले तसेच पालकांना आधार कार्डविषयी माहिती देत शाळेला सहकार्य करण्याचे आवाहन केले. कृती कार्यक्रम पुस्तिकेबाबतही सविस्तर माहिती देण्यात आली.
यानंतर काही मान्यवरांची भाषणे झाली आणि विद्यार्थ्यांना चॉकलेट वाटप करून कार्यक्रमाची सांगता करण्यात आली. संपूर्ण कार्यक्रम आनंददायी व उत्साहपूर्ण वातावरणात पार पडला.
कार्यक्रम यशस्वी करण्यासाठी मुख्याध्यापिका श्रीमती भालेराव मॅडम, श्रीमती निकाळे मॅडम, श्रीमती पवार मॅडम, श्रीमती शिंदे मॅडम तसेच सर्व शिक्षक, विद्यार्थी, पालक आणि शालेय व्यवस्थापन समितीच्या पदाधिकाऱ्यांनी विशेष परिश्रम घेतले.
