घंटागाड्यांवरून ‘स्व-जनगणना’ मोहिमेचा प्रचार
रिसोड (प्रतिनिधी):
जनगणना २०२६ अंतर्गत ‘स्व-जनगणना’ मोहिमेबाबत नागरिकांमध्ये जनजागृती व्हावी तसेच या मोहिमेची माहिती सर्वसामान्यांपर्यंत पोहोचावी, या उद्देशाने रिसोड नगरपरिषदेच्या वतीने विशेष जनजागृती मोहीम राबविण्यात येत आहे.
मुख्याधिकारी सतीश शेवदा यांच्या मार्गदर्शनाखाली शहरातील घंटागाड्यांद्वारे ‘स्व-जनगणना’ मोहिमेचा प्रचार केला जात आहे. रिसोड शहरात सध्या १३ घंटागाड्या कार्यरत असून, कचरा संकलनासोबतच या वाहनांवरून स्व-जनगणनेबाबतची ध्वनिफीत प्रसारित करण्यात येत आहे. त्यामुळे नागरिकांना जनगणनेविषयी माहिती मिळत असून मोहिमेबाबत जागरूकता निर्माण होत आहे.
नगरपरिषद प्रशासनाने नागरिकांना स्व-जनगणनेत सक्रिय सहभाग नोंदविण्याचे आवाहन केले आहे.
दरम्यान, ‘स्व-जनगणना’ मोहिमेचा कालावधी १ मे ते १५ मे २०२६ असा असून, नागरिकांनी वेळेत आपली माहिती नोंदवावी, असेही प्रशासनाकडून सांगण्यात आले आहे.
