एरंडोलचे व्यंगचित्रकार शरद महाजन यांचा विशेष सन्मान
एरंडोल (प्रतिनिधी):
जागतिक व्यंगचित्रकार दिनाचे औचित्य साधून ‘कार्टून कंबाईन्स’ संस्था आणि ‘युवा संवाद सामाजिक’ यांच्या संयुक्त विद्यमाने आयोजित करण्यात आलेला ‘पुणे आंतरराष्ट्रीय व्यंगचित्र महोत्सव २०२६’ मोठ्या उत्साहात संपन्न झाला. पुण्यातील बालगंधर्व कलादालन येथे आयोजित या महोत्सवात तब्बल ४२ देशांतील १५० हून अधिक कलाकारांच्या सुमारे ३०० व्यंगचित्रांचे प्रदर्शन भरविण्यात आले असून, सामाजिक वास्तवावर मिश्किल आणि टोकदार भाष्य करणाऱ्या कलाकृतींना रसिकांचा उत्स्फूर्त प्रतिसाद मिळत आहे.
महोत्सवाचे उद्घाटन उबाठा शिवसेनेच्या उपनेत्या सुषमा अंधारे आणि उपमहापौर परशुराम वाडेकर यांच्या हस्ते करण्यात आले. यावेळी एरंडोल येथील प्रसिद्ध व्यंगचित्रकार शरद महाजन यांचा उपमहापौर परशुराम वाडेकर यांच्या हस्ते विशेष सन्मान करण्यात आला.
या प्रसंगी सकाळ ॲग्रोवनचे व्यंगचित्रकार लहू काळे, श्रीपाद पालकर, अरविंद देशपांडे, रवींद्र बाळापुरे, सोमेश्वर गजमल, सिद्धार्थ नागठाणकर, सुहास पालीमकर, आशिष विखार, योगेश चव्हाण, गिरीश पाटील आदी मान्यवर व्यंगचित्रकारांचा गौरवचिन्ह देऊन सत्कार करण्यात आला.
कार्यक्रमाला ‘कार्टुनिस्टस् कम्बाईन’चे अध्यक्ष गौरव सर्जेराव, उपाध्यक्ष अमित पापळ, खजिनदार उदय मोहिते, मुख्य समन्वयक किशोर शितोळे, आयोजक धनराज गरड, बाळासाहेब धोका, शशिकांत कांबळे यांच्यासह कला क्षेत्रातील अनेक मान्यवर उपस्थित होते.
“व्यंगचित्रकार हा संवेदनांचा जागता पहारेकरी” – सुषमा अंधारे
उद्घाटनपर भाषणात सुषमा अंधारे म्हणाल्या,
“व्यंगचित्रकार हा कमीत कमी शब्दांत आणि मोजक्या रेषांमधून मोठा आशय मांडणारा कलाकार असतो. राजाश्रय नसतानाही सत्याची बाजू मांडण्याचे धाडस तो दाखवतो. आजच्या डिजिटल युगात पत्रकारिता स्वातंत्र्य अनेक आव्हानांना सामोरे जात असताना व्यंगचित्रकार आपल्या कुंचल्यातून सामाजिक संवेदनशीलता जिवंत ठेवत आहेत.”
उपमहापौर परशुराम वाडेकर यांनीही व्यंगचित्र ही समाजपरिवर्तनाची प्रभावी कला असल्याचे सांगत, अशा महोत्सवांची आवश्यकता अधोरेखित केली.
यावेळी ‘कार्टुनिस्टस् कम्बाईन’चे अध्यक्ष गौरव सर्जेराव यांनी पुण्यात व्यंगचित्रकारांसाठी स्वतंत्र ‘व्यंगचित्र भवन’ उभारण्याची मागणी प्रशासनाकडे केली.
हे प्रदर्शन ७ मे ते ९ मे २०२६ दरम्यान सकाळी १० ते रात्री ८ वाजेपर्यंत रसिकांसाठी खुले ठेवण्यात आले होते. कार्यक्रमाचे सूत्रसंचालन किशोर गरड यांनी केले तर आभार प्रदर्शन किशोर शितोळे यांनी मानले.
