वैजापूर | प्रतिनिधी :
वैजापूर तालुक्यातील देवगाव (शनि) येथील गायरान जमिनीवर (गट क्रमांक १९) सुरू असलेले कथित अवैध उत्खनन आता केवळ पर्यावरणाचा प्रश्न न राहता महसूल विभागातील गंभीर अनियमिततेचे प्रकरण म्हणून समोर येत आहे. पोयटा मातीच्या नावाखाली मोठ्या प्रमाणात मुरूम उत्खनन सुरू असल्याचा आरोप होत असून, मृत व्यक्तीच्या नावाने रॉयल्टी फाडल्याचा धक्कादायक प्रकार उघडकीस आल्याचा दावा तक्रारदारांनी केला आहे.
स्थानिकांच्या आरोपानुसार, गायरान जमिनीवर नियमबाह्य पद्धतीने जेसीबी आणि हायवा वाहनांच्या साहाय्याने उत्खनन सुरू आहे. या प्रकरणात महसूल विभागातील काही अधिकाऱ्यांच्या संगनमताची शक्यता व्यक्त केली जात असून, शासनाच्या महसुलालाही मोठा फटका बसत असल्याचा आरोप करण्यात आला आहे.
संबंधित कायदे व कलमे
- एमएलआरसी अॅक्ट १९६६ कलम २२-अ : गायरान जमिनीचा बेकायदेशीर वापर गुन्हा
- एमएलआरसी अॅक्ट १९६६ कलम ४८(७) : अवैध उत्खननावर पाचपट दंडाची तरतूद
- एमएलआरसी अॅक्ट १९६६ कलम ४८(८) : हायवा, जेसीबी जप्त करण्याची तरतूद
- BNS 2023 कलम ३१८(४) : शासन फसवणूक व महसूल चोरी
- BNS 2023 कलम ३३६(३) : बनावट कागदपत्र तयार करणे
- BNS 2023 कलम ३३७ : सरकारी नोंदीत बनावटगिरी
- BNS 2023 कलम ३३८ : मृत व्यक्तीच्या नावाने कागदपत्र तयार करणे
- BNS 2023 कलम ३४०(२) : बनावट दस्तऐवजाचा वापर
तक्रारदारांच्या मते, संबंधित प्रकरणाची निष्पक्ष चौकशी करून दोषींवर कठोर कारवाई करण्यात यावी. तसेच अवैध उत्खनन तात्काळ बंद करून शासनाचा महसूल वाचवावा, अशी मागणी करण्यात आली आहे.
दरम्यान, प्रशासनाने या प्रकरणात त्वरित कारवाई न केल्यास तीव्र आंदोलन छेडण्याचा इशाराही स्थानिक नागरिक व तक्रारदारांनी दिला आहे.
