उसाच्या शेतात मशागत सुरू असताना आढळला बिबट्या
वैजापूर | प्रतिनिधी :
वैजापूर तालुक्यातील गोदातिरी परिसरातील चेंडू फळ येथे आज दुपारी सुमारे २ वाजण्याच्या दरम्यान बिबट्याचे दर्शन झाल्याने शेतकऱ्यांमध्ये भीतीचे वातावरण निर्माण झाले आहे. विलास शास्त्री यांच्या गट क्रमांक ४३ मधील उसाच्या शेतात मशागतीसाठी ट्रॅक्टर गेले असता हा प्रकार उघडकीस आला.
मिळालेल्या माहितीनुसार, ट्रॅक्टर चालक व शेतमजुरांना उसाच्या शेतात अचानक बिबट्या दिसून आला. यावेळी त्यांनी सावधगिरी बाळगत बिबट्याचे फोटो आणि व्हिडिओ मोबाईलमध्ये कैद केले. घटनेनंतर परिसरातील शेतकरी व नागरिकांमध्ये दहशतीचे वातावरण पसरले आहे.
स्थानिक शेतकऱ्यांच्या मते, आधीच अतिवृष्टी, पूरस्थिती, पिकांचे नुकसान आणि आर्थिक अडचणींमुळे शेतकरी संकटात सापडले आहेत. त्यातच वन्य प्राण्यांचा वाढता वावर हा आणखी एक गंभीर प्रश्न बनत चालला आहे.
काही नागरिकांनी वन विभागाच्या कार्यपद्धतीवर नाराजी व्यक्त करत, “अशा घटना घडल्यानंतर तक्रार केली तरी योग्य प्रतिसाद मिळत नाही,” असा आरोप केला. तसेच, या प्रकाराची गंभीर दखल घेऊन वन विभागाने तात्काळ पाहणी करून परिसरात आवश्यक उपाययोजना कराव्यात, अशी मागणी ग्रामस्थांकडून करण्यात येत आहे.
दरम्यान, “एखादी जीवितहानी होण्यापूर्वी प्रशासनाने ठोस पावले उचलावीत,” अशी संतप्त प्रतिक्रिया गंगथडी परिसरातून उमटत आहे.
