पणदरे, ता. बारामती : पणदरे येथील नीराडाव्या कालव्यात पोहताना दहा वर्षीय मुलाचा दुर्दैवी मृत्यू झाल्याची घटना घडली आहे. अजहर सर्फराज आत्तार (वय १०, रा. सातारा) असे मृत मुलाचे नाव आहे.
मिळालेल्या माहितीनुसार, अजहर हा विवाह समारंभानिमित्त मामाच्या गावी पणदरे येथे आला होता. गुरुवारी दुपारच्या सुमारास तो आपल्या मामाच्या मुलांसह इतर मुलांबरोबर नीराडाव्या कालव्यात पोहण्यासाठी गेला होता. कालव्यातील पाण्याचा प्रवाह मोठ्या प्रमाणात असल्याने आणि पोहता न आल्यामुळे तो पाण्यात बुडाला.
घटनेची माहिती मिळताच स्थानिक ग्रामस्थ, माळेगाव पोलीस, महसूल विभाग, नगर परिषद तसेच बचाव पथकाने घटनास्थळी धाव घेत शोधमोहीम सुरू केली. रात्रभर शोधकार्य सुरू ठेवण्यात आले. अखेर शुक्रवारी सकाळी (दि. १५ मे) नगरपालिका रेस्क्यू टीमने कालव्यातून अजहरचा मृतदेह बाहेर काढला.
या घटनेमुळे पणदरे व परिसरात हळहळ व्यक्त होत असून, मृत मुलगा अत्यंत हुशार व मनमिळावू स्वभावाचा असल्याचे नातेवाईकांनी सांगितले.
दरम्यान, प्रशासनाने नागरिकांना कालवे, धरण परिसर तसेच खोल पाण्याच्या ठिकाणी जाताना विशेष काळजी घेण्याचे आवाहन केले आहे.
