दोडामार्ग | प्रतिनिधी
तिलारी घाटातील धोकादायक वळणावर सिमेंट केमिकल वाहतूक करणारे एक अवजड वाहन अडकून पडल्याने घाटातील वाहतूक काही काळ ठप्प झाली. या घटनेमुळे प्रवाशांचे मोठे हाल झाले असून वाहने पर्यायी मार्गाने वळविण्यात आली.
मिळालेल्या माहितीनुसार, सिमेंट केमिकलने भरलेले अवजड वाहन तिलारी घाटातील पहिल्याच धोकादायक वळणावर अडकले. वाहन दरीच्या काठावर अडकल्याने काही काळ भीतीचे वातावरण निर्माण झाले होते. सुदैवाने वाहन खोल दरीत कोसळण्यापासून बचावले.
तिलारी घाट हा अवजड वाहनांसाठी अत्यंत धोकादायक मानला जातो. यापूर्वीही घाटात अपघात, वाहन बिघाड आणि वाहतूक ठप्प होण्याच्या घटना घडल्या आहेत. या घटनेनंतर घाटातील वाहतूक पूर्णपणे विस्कळीत झाली होती.
दरम्यान, प्रशासनाने तातडीने उपाययोजना करत वाहने तेरवण-मेढे या पर्यायी मार्गाने वळविली. घटनेची माहिती मिळताच संबंधित यंत्रणांनी घटनास्थळी धाव घेत वाहन हटविण्याचे काम सुरू केले.
स्थानिक नागरिकांनी तिलारी घाटात अवजड वाहनांच्या वाहतुकीवर नियंत्रण आणण्याची मागणी पुन्हा एकदा केली आहे.
